Musobaqada hijobsiz ishtirok etgan eronlik sportchi uzr so‘rab chiqdi
Tirmashib chiqish bo‘yicha Osiyo chempionatida hijobsiz ishtirok etgan eronlik sportchi Elnaz Rekabi Instagram’da o‘z qilgan harakati uchun uzr so‘radi, deb yozadi BBC.
Rekabi yuzaga kelgan bezovtalik uchun afsusda ekanligini yozdi. Uning ta’kidlashicha, hijobni yechish qarori beixtiyor qabul qilingan. Hozir u va uning jamoasi Seuldan Eronga qaytmoqda.
“Vaqtni noto‘g‘ri belgilash va kutilmaganda devorga ko‘tarilish chaqirig‘i tufayli bosh kiyimim beixtiyor yechilib ketdi”, — deya tushuntiradi sporti.
Deutsche Welle BBC Fors xizmatiga tayanib xabar berishicha, Eron razvedka idoralari Rekabining pasporti va telefonini musodara qilgan. Mamlakat qonunlariga ko‘ra, uni qamoq jazosi kutmoqda.
17-oktabr kuni Rekabi Seulda bo‘lib o‘tgan 2022-yilgi Osiyo chempionatida to‘rtinchi o‘rinni egalladi. U 43 yil ichida musobaqalarda hijobsiz qatnashgan birinchi eronlik sportchi bo‘ldi. Marca xabariga ko‘ra, sportchi bu qadamni hijobni “noto‘g‘ri” o‘ragani uchun Eron politsiyasi tomonidan kaltaklangan 22 yoshli Mahsa Amini o‘limidan so‘ng boshlangan norozilik namoyishlarini qo‘llab-quvvatlash belgisi sifatida qilgan.
18-oktabr kuni esa uning g‘oyib bo‘lgani haqida feyk xabarlar tarqaldi va sportchi shu kunning o‘zida Instagram sahifasi orqali vaziyatga izoh berdi.
Rekabi 2021-yilgi jahon chempionatining bronza medali sovrindori hisoblanadi. Uning Osiyo chempionatida kumush va ikkita bronza medallar ham bor.
