“Bu tadbirkorlar uchun ham, kasanachilar uchun ham yaxshi imkoniyat bo‘ldi”. Mehnat vazirligi mas’uli kasanachilikni tashkil etgan tadbirkorlarga subsidiya berilishi haqida

O‘zbekistonda “Kasanachilikni tashkil etgan tadbirkorlik subyektlarini yana-da qo‘llab-quvvatlash chora-tadbirlari to‘g‘risida” Vazirlar Mahkamasi qarori qabul qilingani xabar berilgandi. Bandlik va mehnat munosabatlari vazirligi mas’uli “Daryo” muxbiriga shu haqda qo‘shimcha ma’lumot berdi.

Vazirlik mas’uli Bekzod Olimovning ma’lumot berishicha, mazkur qaror bugungi kun ehtiyojidan kelib chiqqan holda qabul qilingan.

Bandlik va mehnat munosabatlari vazirligi, shuningdek vazirlikning viloyatlardagi boshqarmalari va hududlardagi bandlik markazlariga murojaat qilgan tadbirkorlar va kasanachilar faoliyati davomida muammoga duch kelayotgani, muammolarning asosiy yechimi mablag‘ bilan bog‘liq ekanini aytib, takliflar berishgan. Shu murojaatlar va takliflar jamlanib, tashabbus vazirlik tomonidan ilgari surildi va qo‘llab-quvvatlandi, — deydi Bekzod Olimov.

Ta’kidlanishicha, qarorga ko‘ra tadbirkorlar kasanachilikni tashkil etganidan kamida 3 oy o‘tganidan so‘ng subsidiya so‘rab Aholi bandligiga ko‘maklashish markaziga yoki Yagona interaktiv davlat xizmatlari portali orqali murojaat qiladi.

Aholi bandligiga ko‘maklashish markazlarining subsidiya ajratish to‘g‘risidagi qarori qabul qilingandan so‘ng 5 ish kuni ichida talabgorga har bir kasanachining dastlabki uch oyi davomidagi kasanachilik faoliyati uchun bir oylik o‘rtacha daromadi miqdorida bir martalik subsidiya ajratiladi. Deylik, kasanachilik bilan shug‘ullanuvchi fuqaro taxminan 1,5 million so‘m maosh olsa uning uch oylik maoshidan o‘rtacha daromadi hisoblanadi. Shunda tadbirkor 10 nafar kasanachi bilan shartnoma tuzgan bo‘lsa unga 15 million so‘m miqdorida subsidiya beriladi, — deydi vazirlik mas’uli.

Qo‘shimcha qilinishicha, tadbirkorlik subyektiga har bir kasanachiga asbob-uskunalar xarid qilib berish xarajatlarining 50 foizgacha bo‘lgan qismi, biroq bazaviy hisoblash miqdorining 15 baravarigacha miqdorida subsidiya ajratiladi.

Kasanachilar asosan mahalla ayollari bo‘lib, deylik bir ayolning qo‘lidan tikuvchilik keladi. Biroq, uning yosh bolasi bo‘lgani sabab u uydan turib ishlashni xohlaydi. Shunday paytda tadbirkorning bunday ishchilari uchun tikuv mashinasi xarid qilishga ehtiyoj tug‘iladi. Bu qaror bilan aynan shu asbob-uskuna sotib olish uchun mablag‘ ham beriladi, — deydi Bekzod Olimov.

Vazirlik xodimining ma’lum qilishicha, endilikda aholi bandligiga ko‘maklashish markazi va tadbirkorlik subyekti o‘rtasida ijtimoiy kontrakt tuziladi.

Tuman yoki shahar hokimliklari hamda aholi bandligiga ko‘maklashish markazlari Mahallabay ishlash va tadbirkorlikni rivojlantirish markazi bilan birgalikda kelgusi yil uchun joriy yilning 10-dekabriga qadar ish bilan band bo‘lmagan fuqarolarni kasanachilik yo‘nalishida kasbga o‘qitish bo‘yicha davlat buyurtmasini shakllantiradi. Aholi bandligiga ko‘maklashish markazlari davlat buyurtmasi asosida nodavlat ta’lim tashkilotlarida kasbga o‘qitilgan fuqarolarning malakasini baholash choralarini ko‘radi va u bilan bog‘liq xarajatlarni har bir band bo‘lmagan shaxs uchun bazaviy hisoblash miqdorining to‘rt baravaridan ortiq bo‘lmagan miqdorda qoplab beradi, — deydi Bekzod Olimov.