«Бу тадбиркорлар учун ҳам, касаначилар учун ҳам яхши имконият бўлди». Меҳнат вазирлиги масъули касаначиликни ташкил этган тадбиркорларга субсидия берилиши ҳақида

Ўзбекистонда «Касаначиликни ташкил этган тадбиркорлик субъектларини яна-да қўллаб-қувватлаш чора-тадбирлари тўғрисида» Вазирлар Маҳкамаси қарори қабул қилингани хабар берилганди. Бандлик ва меҳнат муносабатлари вазирлиги масъули «Дарё» мухбирига шу ҳақда қўшимча маълумот берди.

Вазирлик масъули Бекзод Олимовнинг маълумот беришича, мазкур қарор бугунги кун эҳтиёжидан келиб чиққан ҳолда қабул қилинган.

Бандлик ва меҳнат муносабатлари вазирлиги, шунингдек вазирликнинг вилоятлардаги бошқармалари ва ҳудудлардаги бандлик марказларига мурожаат қилган тадбиркорлар ва касаначилар фаолияти давомида муаммога дуч келаётгани, муаммоларнинг асосий ечими маблағ билан боғлиқ эканини айтиб, таклифлар беришган. Шу мурожаатлар ва таклифлар жамланиб, ташаббус вазирлик томонидан илгари сурилди ва қўллаб-қувватланди, — дейди Бекзод Олимов.

Таъкидланишича, қарорга кўра тадбиркорлар касаначиликни ташкил этганидан камида 3 ой ўтганидан сўнг субсидия сўраб Аҳоли бандлигига кўмаклашиш марказига ёки Ягона интерактив давлат хизматлари портали орқали мурожаат қилади.

Аҳоли бандлигига кўмаклашиш марказларининг субсидия ажратиш тўғрисидаги қарори қабул қилингандан сўнг 5 иш куни ичида талабгорга ҳар бир касаначининг дастлабки уч ойи давомидаги касаначилик фаолияти учун бир ойлик ўртача даромади миқдорида бир марталик субсидия ажратилади. Дейлик, касаначилик билан шуғулланувчи фуқаро тахминан 1,5 миллион сўм маош олса унинг уч ойлик маошидан ўртача даромади ҳисобланади. Шунда тадбиркор 10 нафар касаначи билан шартнома тузган бўлса унга 15 миллион сўм миқдорида субсидия берилади, — дейди вазирлик масъули.

Қўшимча қилинишича, тадбиркорлик субъектига ҳар бир касаначига асбоб-ускуналар харид қилиб бериш харажатларининг 50 фоизгача бўлган қисми, бироқ базавий ҳисоблаш миқдорининг 15 бараваригача миқдорида субсидия ажратилади.

Касаначилар асосан маҳалла аёллари бўлиб, дейлик бир аёлнинг қўлидан тикувчилик келади. Бироқ, унинг ёш боласи бўлгани сабаб у уйдан туриб ишлашни хоҳлайди. Шундай пайтда тадбиркорнинг бундай ишчилари учун тикув машинаси харид қилишга эҳтиёж туғилади. Бу қарор билан айнан шу асбоб-ускуна сотиб олиш учун маблағ ҳам берилади, — дейди Бекзод Олимов.

Вазирлик ходимининг маълум қилишича, эндиликда аҳоли бандлигига кўмаклашиш маркази ва тадбиркорлик субъекти ўртасида ижтимоий контракт тузилади.

Туман ёки шаҳар ҳокимликлари ҳамда аҳоли бандлигига кўмаклашиш марказлари Маҳаллабай ишлаш ва тадбиркорликни ривожлантириш маркази билан биргаликда келгуси йил учун жорий йилнинг 10 декабрига қадар иш билан банд бўлмаган фуқароларни касаначилик йўналишида касбга ўқитиш бўйича давлат буюртмасини шакллантиради. Аҳоли бандлигига кўмаклашиш марказлари давлат буюртмаси асосида нодавлат таълим ташкилотларида касбга ўқитилган фуқароларнинг малакасини баҳолаш чораларини кўради ва у билан боғлиқ харажатларни ҳар бир банд бўлмаган шахс учун базавий ҳисоблаш миқдорининг тўрт бараваридан ортиқ бўлмаган миқдорда қоплаб беради, — дейди Бекзод Олимов.