17 октябрда Хитой давлат банклари заифлашиб бораётган юань курсини ҳимоя қилиш учун интервенсияни кучайтирди. Бу ҳақда Reuters хабар бермоқда.
Агентликка аксарият банклар катта ҳажмдаги долларни сотгани ҳамда своп ва спот савдолар комбинациясидан фойдаланганини билдирди.
Своп — битимда белгиланган муддат ва валюта курси бўйича ҳисоблашиш (қайта алмашув) шарти асосида валюталарни бир вақтда сотиб олиш ва сотиш бўйича икки томонлама битимдир.
Валютавий своп операцияси икки қисмдан иборат бўлиб, биринчи қисмини амалга оширишда валюталарнинг дастлабки алмашинуви (спот битим), иккинчи қисмини бажаришда эса, қайта алмашинуви (форвард битими) ва своп шартномасининг ёпилиши содир бўлади.
Олтита банк манбасининг маълум қилишича, мамлакатнинг йирик давлат банклари форвард бозорида юанни долларга алмаштирган ва бу долларларни спот бозорда сотган. Бундай валюта интервенсияси Хитой томонидан 2018—2019 йилларда ҳам қўлланилган.
Валюта интервенсияси — мамлакат марказий банкининг валюта бозорига ва валюта курсига чет эл ёки миллий валютанинг катта суммасини сотиб олиш ёки сотиш йўли билан аралашуви.
Шундан сўнг, форвард курси бир доллар учун 6,95 юанга тушди. Агентлик манбаларидан бирининг таъкидлашича, операция Хитойнинг валюта захираларига (3 триллион доллар) таъсир қилмаган.
26-сентябр куни Хитой Халқ банки юань курсини бир доллар учун 7,0722 га туширди, бу 2022 йил 30 июндан бери энг паст кўрсаткичдир.
Жорий йилда юань долларга нисбатан 11 фоиздан ортиқ заифлашди. Хитой Марказий банки доллар бўйича форвард шартномаларининг захира нормасини нолдан 20 фоизгача оширди.
Мавзуга доир:
Изоҳ (0)