O‘zbekistonda Apple, Google yoki Facebook singari ulkan loyihalardan ko‘ra, agrar sohadagi innovatsion texnologiyalarni rivojlantirish muhimroq. Bu haqda Innovatsion rivojlanish vaziri o‘rinbosari Shahlo Turdiqulova 17-oktabr kuni InnoWeek haftaligiga oid matbuot anjumanida aytib o‘tdi, deya xabar bermoqda “Daryo” muxbiri.
Shahlo Turdiqulovaning ta’kidlashicha, innovatsiyalar ikki turga bo‘linadi va ularning har biri respublikamizda rivojlanmoqda.
“Innovatsiya ikki turga bo‘linadi. Soft va Hard. Butun dunyoda eng rivojlangani Soft innovatsiyalardir. Masalan, kompyuter dasturlar, Apple, Google va boshqalar shu toifadan. O‘zbekiston sharoitida oxirgi yillarda dunyo miqyosida qaralsa, hard startaplar rivojlanib kelmoqda. Bu qiyinroq masala. Chunki Soft’ni yozish uchun kompyuter va bilim kerak. Hard uchun esa laboratoriya va boshqa sharoitlar bo‘lishi zarur.
O‘ylashimcha, bizning davlat nuqtayi nazardan Hard innovatsiyalar yaxshiroq. Bizda Hard innovatsiyalar ko‘paygani ilm-fanimiz rivojlanganini ko‘rsatyapti. Ilg‘or innovatsiyalar markazimizda ilmiy startaplarni rivojlantirishga yordam beradigan akselerator ishlamoqda. Agrar texnikalar uchun innovatsiyalarning ahamiyati muhim. Mamlakatimiz uchun ko‘proq foyda beradigan innovatsiyalar Hard innovatsiyalar deb hisoblaymiz. Albatta, Soft innovatsiyalar ham rivojlanmoqda. Bu yo‘nalishda ham ko‘p loyihalarni moliyalashtiryapmiz”, – dedi vazir o‘rinbosari.
Matbuot anjumanida “InnoWeek” xalqaro innovatsion g‘oyalar haftaligi to‘g‘risida ham ma’lumot berildi. Haftalik 17-21-oktabr kunlari bo‘lib o‘tadi. Tadbirda mahalliy va 50 dan ortiq davlatning innovatsiya markazlari, investitsiya fondlari, olimlari qatnashadi. Yashil innovatsiyalarni rivojlantirish, robototexnika, energetika, IT va boshqa sohalardagi muhim masalalar muhokama etiladi, ko‘rgazmalar o‘tkaziladi. Haftalik davomida xalqaro va mahalliy hamkorlar bilan shartnomalar imzolanishi ham rejalashtirilgan.
Izoh (0)