Ўзбекистонда Apple, Google ёки Facebook сингари улкан лойиҳалардан кўра, аграр соҳадаги инновацион технологияларни ривожлантириш муҳимроқ. Бу ҳақда Инновацион ривожланиш вазири ўринбосари Шаҳло Турдиқулова 17 октябрь куни InnoWeek ҳафталигига оид матбуот анжуманида айтиб ўтди, дея хабар бермоқда «Дарё» мухбири.
Шаҳло Турдиқулованинг таъкидлашича, инновациялар икки турга бўлинади ва уларнинг ҳар бири республикамизда ривожланмоқда.
«Инновация икки турга бўлинади. Soft ва Hard. Бутун дунёда энг ривожлангани Soft инновациялардир. Масалан, компьютер дастурлар, Apple, Google ва бошқалар шу тоифадан. Ўзбекистон шароитида охирги йилларда дунё миқёсида қаралса, ҳард стартаплар ривожланиб келмоқда. Бу қийинроқ масала. Чунки Soft’ни ёзиш учун компьютер ва билим керак. Hard учун эса лаборатория ва бошқа шароитлар бўлиши зарур.
Ўйлашимча, бизнинг давлат нуқтаи назардан Hard инновациялар яхшироқ. Бизда Hard инновациялар кўпайгани илм-фанимиз ривожланганини кўрсатяпти. Илғор инновациялар марказимизда илмий стартапларни ривожлантиришга ёрдам берадиган акселератор ишламоқда. Аграр техникалар учун инновацияларнинг аҳамияти муҳим. Мамлакатимиз учун кўпроқ фойда берадиган инновациялар Hard инновациялар деб ҳисоблаймиз. Албатта, Soft инновациялар ҳам ривожланмоқда. Бу йўналишда ҳам кўп лойиҳаларни молиялаштиряпмиз», – деди вазир ўринбосари.
Матбуот анжуманида «InnoWeek» халқаро инновацион ғоялар ҳафталиги тўғрисида ҳам маълумот берилди. Ҳафталик 17-21 октябрь кунлари бўлиб ўтади. Тадбирда маҳаллий ва 50 дан ортиқ давлатнинг инновация марказлари, инвестиция фондлари, олимлари қатнашади. Яшил инновацияларни ривожлантириш, робототехника, энергетика, IT ва бошқа соҳалардаги муҳим масалалар муҳокама этилади, кўргазмалар ўтказилади. Ҳафталик давомида халқаро ва маҳаллий ҳамкорлар билан шартномалар имзоланиши ҳам режалаштирилган.
Изоҳ (0)