Farg‘onada 2022-yilning o‘tgan 9 oyi davomida Jinoyat ishlari bo‘yicha sudlar tomonidan Jinoyat-protsessual kodeksining 83-moddasiga asosan 21 nafar shaxs oqlandi. Bu haqda Farg‘ona viloyati sudida o‘tkazilgan matbuot anjumanida ma’lum qilindi, deb xabar berdi “Daryo” muxbiri Azizjon Ermatov.
Qayd etilishicha, sud-huquq sohasida amalga oshirilayotgan islohotlar natijasida o‘tgan yili 5 nafar shaxsga nisbatan tergov organi qo‘ygan ayblovlar bekor qilinib, oqlangan bo‘lsa, joriy yilda 21 nafar shaxs apellyatsiya instansiyasida Jinoyat-protsessual kodeksining 83-moddasiga asosan reabilitatsiya qilinib, ularga nisbatan yuritilgan jinoyat ishlari tugatilgan.
Shuningdek, ushbu davrda 1 ming 126 nafar shaxsga nisbatan dastlabki tergov organi tomonidan qo‘yilgan ayblov o‘zgartirilib hukm chiqarilgan.
2022-yilning to‘qqiz oyida jinoyat ishlari bo‘yicha tuman va shahar sudlari tomonidan 7 ming 321 ta jinoyat ishi tamomlangan. Tamomlangan ishlardan 5 ming 882 nafar shaxsga nisbatan 4 ming 784 ta ish bo‘yicha hukm chiqarilgan.
Bundan tashqari, hisobot davrida 2 ming 631 nafar shaxsga nisbatan 2 ming 520 ta ish tugatilgan. Ta’kidlanishicha, matbuot anjumanida Farg‘ona viloyat sudi, Farg‘ona viloyat ma’muriy sudi, tumanlararo, tuman va shahar sudlari tomonidan joriy yilning 9 oyi davomida ko‘rilgan jinoyat, fuqarolik, iqtisodiy hamda ma’muriy ishlar tahlili yuzasidan axborot berilgan.
Izoh (0)