O‘zbekistonda 9 oyda tez yordamga qancha yolg‘on chaqiriq kelib tushgani ma’lum qilindi

O‘zbekistonda tez yordamga yolg‘on chaqiriqlar soni ikki barobar kamaydi, deb xabar bermoqda SSV matbuot xizmati.

Respublika tez tibbiy yordam markazining Tez tibbiy yordam xizmatini muvofiqlashtiruvchi dispetcherlik markazi rahbari Davlatbek Yuldashevning aytishicha, 2022-yilning 9 oyida “103” xizmatiga jami 4 452 ta yolg‘on chaqiriq kelib tushdi. Mazkur ko‘rsatkichni o‘tgan yilning ayni shu davri bilan taqqoslasak, asossiz murojaatlar soni ikki barobarga kamayganini ko‘rish mumkin. Ya’ni, 2021-yilning yanvar-sentabr oylarida bunday chaqiriqlar soni 8027 tani tashkil qilgan.

Ammo ayrim hududlarda hamon yolg‘on murojaatlar soni yuqoriligicha qolmoqda. Tahlillar shuni ko‘rsatadiki, joriy yilning o‘tgan to‘qqiz oyi davomida eng ko‘p bunday chaqiriq Toshkent viloyatida qayd etilib, mazkur raqam 1 208 tani tashkil etdi. Keyingi o‘rinda 590 ta chaqiriq bilan Qashqadaryo viloyati joylashgan. Shuningdek, Farg‘ona viloyatidan 587 ta ana shunday murojaat kelib tushgan.

“Yolg‘on chaqiriqlar sababli aksariyat hollarda tibbiyot brigadalari chaqiriq manziliga o‘z vaqtida yetib bora olmaydi. Oqibatda shifokorlar haqiqiy yordamga muhtoj bemorlar qolib, yolg‘on qo‘ng‘iroq egasi va uning manzilini aniqlashtirish bilan ovora bo‘ladi. Bu esa og‘ir bemorlar hayotini xavf ostiga qo‘yishi aniq”, — deydi Davlatbek Yuldashev.

Ma’lumot uchun, 2022-yilning 6 oyida Respublika tez tibbiy yordam xizmatiga kelib tushgan 2727 ta murojaat yolg‘on chaqiriq deb baholangandi.