Ўзбекистонда тез ёрдамга ёлғон чақириқлар сони икки баробар камайди, деб хабар бермоқда ССВ матбуот хизмати.
Республика тез тиббий ёрдам марказининг Тез тиббий ёрдам хизматини мувофиқлаштирувчи диспетчерлик маркази раҳбари Давлатбек Юлдашевнинг айтишича, 2022 йилнинг 9 ойида «103» хизматига жами 4 452 та ёлғон чақириқ келиб тушди. Мазкур кўрсаткични ўтган йилнинг айни шу даври билан таққосласак, асоссиз мурожаатлар сони икки баробарга камайганини кўриш мумкин. Яъни, 2021 йилнинг январь сентябрь ойларида бундай чақириқлар сони 8027 тани ташкил қилган.
Аммо айрим ҳудудларда ҳамон ёлғон мурожаатлар сони юқорилигича қолмоқда. Таҳлиллар шуни кўрсатадики, жорий йилнинг ўтган тўққиз ойи давомида энг кўп бундай чақириқ Тошкент вилоятида қайд этилиб, мазкур рақам 1 208 тани ташкил этди. Кейинги ўринда 590 та чақириқ билан Қашқадарё вилояти жойлашган. Шунингдек, Фарғона вилоятидан 587 та ана шундай мурожаат келиб тушган.
«Ёлғон чақириқлар сабабли аксарият ҳолларда тиббиёт бригадалари чақириқ манзилига ўз вақтида етиб бора олмайди. Оқибатда шифокорлар ҳақиқий ёрдамга муҳтож беморлар қолиб, ёлғон қўнғироқ эгаси ва унинг манзилини аниқлаштириш билан овора бўлади. Бу эса оғир беморлар ҳаётини хавф остига қўйиши аниқ», — дейди Давлатбек Юлдашев.
Маълумот учун, 2022 йилнинг 6 ойида Республика тез тиббий ёрдам хизматига келиб тушган 2727 та мурожаат ёлғон чақириқ деб баҳоланганди.
Изоҳ (0)