Qirg‘iziston prezidenti Sadir Japarov Rossiya rahbari Vladimir Putindan Tojikiston bilan chegarani delimitatsiya qilish masalasini hal etishda yordam so‘radi, deb yozadi “RIA Novosti” Qirg‘iziston Xavfsizlik kengashi kotibi Marat Imankulovga tayanib.
“Ostonadagi uchrashuvda uch yetakchi orasida chegaralar masalasida ochiq suhbat bo‘lib o‘tdi… Japarov Putindan bu masalani yechishda yordam so‘radi, chunki bizning o‘zimiz uchun buni hal qilish tobora qiyinlashib bormoqda”, — dedi Imankulov “Birinchi radio” davlat radiostansiyasi efirida.
Uning so‘zlariga ko‘ra, Rossiya prezidenti bu haqda o‘ylab ko‘rishga, hujjatlarni ko‘tarishga, tomonlarning variantlarini ko‘rib chiqib, ularni baholashga va’da bergan.
“Rossiyada arxiv hujjatlar va xaritalar bo‘lishi mumkinki, ular chegaralar masalasini hal qilishda yordam berishi mumkin”, — deya qo‘shib qo‘ydi Xavfsizlik kengashi kotibi.
Qirg‘iziston prezidenti Sadir Japarov, Rossiya prezidenti Vladimir Putin va Qojikiston rahbari Emomali Rahmonning uchrashuvi o‘tgan hafta Ostonada bo‘lib o‘tdi. Ular qirg‘iz-tojik davlat chegarasini delimitatsiya qilish masalasini muhokama etdi.
Chegaradagi ziddiyat
Tojikiston va Qirg‘iziston chegarasidagi katta ko‘lamli jangovar to‘qnashuvlar 14—17-sentabr kunlari sodir bo‘ldi. Tomonlar haligacha bir-birini otishmalarda ayblamoqda.Qirg‘iziston to‘qnashuvlar natijasida 62 nafar fuqarosi halok bo‘lib, 198 nafari jabrlanganini ma’lum qildi. Tojikiston esa rasman 41 nafar qurbon va 30 nafar yarador haqida bayonot berdi.
25-sentabr kuni ikki mamlakat vakillari vaziyatni tartibga solish haqida bayonnoma imzolab, chegaradagi nizoni to‘xtatishga hamda uni delimitatsiya va demarkatsiya qilish jarayonini tezlashtirishga kelishib oldi.
Izoh (1)
Haqida bo'ladi imlo xato bor