Donetskda ma’muriy bino o‘qqa tutildi, Kupyanskda Ukraina bayrog‘i aks etgan graffitilar chizilmoqda. Urushning 235-kunidan fotoreportaj
Ukraina va Rossiya kuchlari parallel hujumlarini davom ettirmoqda: Ukraina Qurolli kuchlari Xarkov va Lugansk viloyatlari chegarasida, “Vagner” otryadlari esa Donetsk viloyatidagi Baxmutda. 16-oktabr kuni Belgorod viloyati rasmiylari harbiy poligonda avvalgi kuni sodir bo‘lgan ommaviy qotillik haqida xabar berdi. Rossiya Mudofaa vazirligi ma’lumotlariga ko‘ra, 11 kishi halok bo‘lgan, 15 kishi yaralangan. Biroq SOTA nashri voqea guvohiga tayanib, 22 kishi halok bo‘lgani va 16 kishi yaralangani haqida xabar bermoqda. Urushni o‘rganish bo‘yicha Amerika instituti Rossiya Ukraina hududida etnik tozalash ishlarini olib borayotganini, bosib olingan hududlardan ukrainaliklarni olib chiqib, ularning o‘rniga Rossiya fuqarolarini ko‘chirib kelayotganini da’vo qilmoqda. Meduza urushning 235-kuniga oid asosiy fotosuratlarni taqdim etdi.
Donetskdagi ma’muriyat binosi o‘qqa tutilganidan keyingi vayronagarchilik
Donetskda rossiyaparast rasmiylar shahar ma’muriyati sifatida foydalanadigan bino 16-oktabr kuni ertalab o‘qqa tutildi. “RIA Novosti” o‘zini o‘zi respublika deb e’lon qilgan Donetsk xalq respublikasi vakolatxonasiga tayanib, xabar berishicha hujum Ukraina qo‘shinlari tomonidan amalga oshirilgan.Foto: Reuters
O‘t o‘chiruvchilar Donetskdagi ma’muriyat binosiga raketa urilganidan keyin yuzaga kelgan yong‘inni o‘chirmoqda. DXR ma’lumotlariga ko‘ra, binoga HIMARS yoppasiga o‘t ochuvchi reaktiv tizimdan otilgan Ukraina raketasi tushgan, portlash binoning oynalarini sindirib yuborgan, uchta mashina yonib ketgan, ikki fuqaro jarohatlangan. Ukraina Qurolli kuchlari Bosh shtabi bu vaziyatga izoh bermadi.Foto: Anadolu
Shahar ma’muriyati binosining raketa hujumidan vayron bo‘lgan xonalaridan biri.Foto: “TASS”
Ozod qilingan Kupyanskda Ukraina bayrog‘i aks etgan graffitilar chizilmoqda
Xarkov viloyatining Kupyansk shahrida ukrainalik rassom o‘q va raketa parchalarining izlari qolgan devorga surat chizmoqda. Shahar fevral oyining oxirida rus qo‘shinlari tomonidan bosib olingan edi. 10-sentabr kuni Kupyansk ustida yana Ukraina bayrog‘i ko‘tarildi.Foto: Reuters
Ko‘cha rassomlari Kupyanskdagi uy devoriga Ukraina bayrog‘i ranglarida graffiti chizmoqda.Foto: EPA
Ukrainalik askar va ko‘cha rassomi shahar nomini ukrain tilida qayta yozmoqda. Rossiya kuchlari Kupyanskni bosib olgan paytda uni rus tilida yozib ketishgan.Foto: EPA
Ukrainalik askarlar o‘lja sifatida olingan tankda
Ukraina askarlari Kupyansk yaqinida qo‘lga olingan rus tankiga minib ketmoqda.Foto: Reuters
Ukrainalik harbiylar Rossiya tankidan akkumlyatorini olib, zaryad qilish uchun olib ketmoqda.Foto: Reuters
Ukraina harbiylari qo‘lga olingan rus tankini o‘rmonda shoxlar bilan bekitmoqda.Foto: Reuters
Kiyevda ommaviy raketa zarbalaridan keyin bir hafta o‘tdi
Taras Shevchenko universiteti qoshidagi Maksimovich ilmiy kutubxonasi zali. 10-oktabr kuni Rossiya qo‘shinlari Kiyev va Ukrainaning boshqa ko‘plab shaharlariga hujum qildi. Poytaxtdagi universitet binosi ham o‘qqa tutildi. Ilmiy kutubxona zali ayniqsa qattiq zarba oldi: u portlash nuqtasiga juda yaqin joyda — binoning burchagida joylashgan.Foto: Anadolu
Bolalar Taras Shevchenko parkiga raketa tushganidan keyin hosil bo‘lgan o‘rada o‘ynamoqda. 10-oktabr kuni shahar markazdagi suv ta’minoti tarmog‘i, 101 Tower biznes markazi binosi va “Klichko ko‘prigi” deb nomlanuvchi piyodalar va velosiped ko‘prigi shikastlangan edi.Foto: Anadolu
Izoh (0)