Yevropa Ittifoqining 27 davlati tashqi ishlar vazirlari Armaniston va Ozarbayjon chegarasiga fuqarolik missiyasini yuborish bo‘yicha kelishib oldi. Bu haqda YI kengashi bayonotiga tayanib, Anadolu xabar bermoqda.
“Bugun Kengash Ozarbayjon bilan xalqaro chegaraning Armaniston tomoniga Yevropa Ittifoqining 40 nafargacha ekspertini yuborishga qaror qildi. Ularga mintaqadagi vaziyatni kuzatish, tahlil qilish va hisobot berish vazifasi yuklatiladi”, — deyiladi bayonotda.
Tegishli qaror Armaniston, Ozarbayjon va Fransiya rahbarlari hamda Yevropa kengashi rahbarining 6-oktabr kuni Pragada bo‘lib o‘tgan uchrashuvidan so‘ng qabul qilindi. Missiya “hududda tinchlik va xavfsizlikni tiklashga ko‘maklashish, ishonchni mustahkamlash va ikki davlat o‘rtasidagi xalqaro chegarani delimitatsiya qilish”ga qaratilgan bo‘ladi.
Pragadagi uchrashuvda Armaniston va Ozarbayjon sentabr oyidagi mojarodan so‘ng bir-birining hududiy yaxlitligini va suverenitetini tan olgan edi.
Armaniston va Ozarbayjon o‘rtasidagi ziddiyat
Yerevan va Baku o‘rtasida navbatdagi keskinlik 12-sentabrdan 13-sentabrga o‘tar kechasi boshlandi. Armaniston Ozarbayjonni janubi-sharqiy chegarani o‘qqa tutishda aybladi. O‘z navbatida, Boku ham Armaniston tomondan Ozarbayjon armiyasining ta’minot yo‘llari minalangani, shuningdek, o‘t ochilganini da’vo qildi.
13-sentabr tongida tomonlar Moskva vositachiligida o‘t ochishni to‘xtatishga kelishdi, ammo otishmalar to‘xtamadi va ikki mamlakat ham bunda qarshi tarafni aybladi. 14-sentabr oqshomida tomonlar tinchlik bo‘yicha yana bir bor kelishuvga erishdi.
Armaniston KXSHTdan yordam so‘radi, biroq ular tinchlikparvar kuchlarni yuborishdan bosh tortdi. KXSHT Armanistonga o‘z missiyasini jo‘natdi, 19-sentabr kuni guruh nizoni tinchlantirish uchun takliflar ishlab chiqqanini ma’lum qildi.
Izoh (0)