Қирғизистон президенти Садир Жапаров Россия раҳбари Владимир Путиндан Тожикистон билан чегарани делимитация қилиш масаласини ҳал этишда ёрдам сўради, деб ёзади «РИА Новости» Қирғизистон Хавфсизлик кенгаши котиби Марат Иманкуловга таяниб.
«Остонадаги учрашувда уч етакчи орасида чегаралар масаласида очиқ суҳбат бўлиб ўтди… Жапаров Путиндан бу масалани ечишда ёрдам сўради, чунки бизнинг ўзимиз учун буни ҳал қилиш тобора қийинлашиб бормоқда», — деди Иманкулов «Биринчи радио» давлат радиостанцияси эфирида.
Унинг сўзларига кўра, Россия президенти бу ҳақда ўйлаб кўришга, ҳужжатларни кўтаришга, томонларнинг вариантларини кўриб чиқиб, уларни баҳолашга ваъда берган.
«Россияда архив ҳужжатлар ва хариталар бўлиши мумкинки, улар чегаралар масаласини ҳал қилишда ёрдам бериши мумкин», — дея қўшиб қўйди Хавфсизлик кенгаши котиби.
Қирғизистон президенти Садир Жапаров, Россия президенти Владимир Путин ва Қожикистон раҳбари Эмомали Раҳмоннинг учрашуви ўтган ҳафта Остонада бўлиб ўтди. Улар қирғиз-тожик давлат чегарасини делимитация қилиш масаласини муҳокама этди.
Чегарадаги зиддият
Тожикистон ва Қирғизистон чегарасидаги катта кўламли жанговар тўқнашувлар 14—17 сентябрь кунлари содир бўлди. Томонлар ҳалигача бир-бирини отишмаларда айбламоқда.Қирғизистон тўқнашувлар натижасида 62 нафар фуқароси ҳалок бўлиб, 198 нафари жабрланганини маълум қилди. Тожикистон эса расман 41 нафар қурбон ва 30 нафар ярадор ҳақида баёнот берди.
25 сентябрь куни икки мамлакат вакиллари вазиятни тартибга солиш ҳақида баённома имзолаб, чегарадаги низони тўхтатишга ҳамда уни делимитация ва демаркация қилиш жараёнини тезлаштиришга келишиб олди.
Изоҳ (1)
Haqida bo'ladi imlo xato bor