Фарғонада 2022 йилнинг ўтган 9 ойи давомида Жиноят ишлари бўйича судлар томонидан Жиноят-процессуал кодексининг 83-моддасига асосан 21 нафар шахс оқланди. Бу ҳақда Фарғона вилояти судида ўтказилган матбуот анжуманида маълум қилинди, деб хабар берди «Дарё» мухбири Азизжон Эрматов.
Қайд этилишича, суд-ҳуқуқ соҳасида амалга оширилаётган ислоҳотлар натижасида ўтган йили 5 нафар шахсга нисбатан тергов органи қўйган айбловлар бекор қилиниб, оқланган бўлса, жорий йилда 21 нафар шахс апелляция инстанциясида Жиноят-процессуал кодексининг 83-моддасига асосан реабилитация қилиниб, уларга нисбатан юритилган жиноят ишлари тугатилган.
Шунингдек, ушбу даврда 1 минг 126 нафар шахсга нисбатан дастлабки тергов органи томонидан қўйилган айблов ўзгартирилиб ҳукм чиқарилган.
2022 йилнинг тўққиз ойида жиноят ишлари бўйича туман ва шаҳар судлари томонидан 7 минг 321 та жиноят иши тамомланган. Тамомланган ишлардан 5 минг 882 нафар шахсга нисбатан 4 минг 784 та иш бўйича ҳукм чиқарилган.
Бундан ташқари, ҳисобот даврида 2 минг 631 нафар шахсга нисбатан 2 минг 520 та иш тугатилган. Таъкидланишича, матбуот анжуманида Фарғона вилоят суди, Фарғона вилоят маъмурий суди, туманлараро, туман ва шаҳар судлари томонидан жорий йилнинг 9 ойи давомида кўрилган жиноят, фуқаролик, иқтисодий ҳамда маъмурий ишлар таҳлили юзасидан ахборот берилган.
Изоҳ (0)