Xalq deputatlari Paxtaobod tuman Kengashining navbatdan tashqari o‘ttiz beshinchi sessiyasida Favqulodda vaziyatlar vazirining moliyaviy-iqtisodiy va moddiy-texnik ta’minot masalalari bo‘yicha o‘rinbosari Azizbek Latifjonov tumanning yangi rahbari sifatida tanishtirildi. Bu haqda “Daryo” muxbiri Umidjon Mamarasulov xabar bermoqda.
Paxtaobod tumaniga shu paytgacha rasman Elyor Usmonov hokimlik qilib kelayotgan edi. Usmonov 2022-yilning 18-fevral kuni Paxtaobod tumani hokimi etib tayinlangandi. U bunga qadar Markaziy bankning Andijon viloyati bosh boshqarmasi boshlig‘i vazifasida ishlagan.
Elyor Usmonov 27-sentabr kuni prezident Administratsiyasi rahbari Sardor Umurzoqov raisligida o‘tkazilgan videoselektor yig‘ilishida noqonuniy va lavozimiga mos kelmaydigan xatti-harakatlari sababli ishdan bo‘shatilgandi.
Yangi hokim Azizbek Latifjonov 1977-yil viloyatning Izboskan tumanida tug‘ilgan bo‘lib, 1999-yilda Andijon muhandislik-iqtisodiyot institutini (sirtqi), 2000-yilda esa Bank-moliya ayeademiyasini tugatgan. Mutaxassisligi bo‘yicha iqtisodchi.
Ish faoliyatini 1994-yilda “O‘zbekiston sanoat-qurilish banki” ochiq aksiyadorlik tijorat banki Andijon viloyati bo‘limi pul almashtirish shaxobchasi kassirligidan boshlagan. Turli yillarda ushbu bankning Andijon viloyati bo‘limi xalq xo‘jaligi tarmoqlarini kreditlashtirish va tahlil qilish bo‘limi boshlig‘i o‘rinbosari, qurilish majmuasi korxona va tashkilotlariga qarz berish, kapital mablag‘larni moliyalashtirish va texnik nazorati bo‘limi boshlig‘i, bankning Bunyodkor filiali boshqaruvchisi vazifalarida ishlagan.
2007—2018-yillar davomida Moliya vazirligi Investitsiyalar boshqarmasi hududiy kapital qurilish dasturlarini moliyaviy tartibga solish bo‘limi boshlig‘i, vazirlikning investitsiyalar boshqarmasi boshlig‘i o‘rinbosari, boshlig‘i lavozimlarida faoliyat olib borgan.
2018-yildan Favqulodda vaziyatlar vazirining moddiy-texnika va moliya-iqtisodiyot bo‘yicha o‘rinbosari vazifasida ishlab kelayotgandi.
Izoh (0)