Toshkent viloyatida 26 yoshli haydovchi o‘ldirildi. Gumonlanuvchilar orasida 11-sinf o‘quvchisi ham bor. Bu haqda “Daryo” so‘roviga javoban Bosh prokuratura axborot xizmati rahbari Hayot Shamsutdinov ma’lumot berdi.
Ma’lum qilinishicha, qotillik voqeasi 2022-yilning 13-oktabr kuni soat 23:00 dan keyin sodir bo‘lgan.
Uch nafar fuqaro Sirdaryo—Toshkent yo‘nalishida yo‘lovchi tashish faoliyati bilan shug‘ullanuvchi 26 yoshli A.E. bilan suhbatlashib, ularni Bo‘stonliq tumani hududiga olib borib kelishga ko‘ndiradi. Va uning Lacetti rusumli avtomashinasiga o‘tirib, mashinada pochta sifatida olingan 14 million so‘m pul borligini bilgach, haydovchini aldab Quyi Chirchiq tumanining “Tolovul” mahallasi hududiga olib boradi. Hamda bosqinchilik yo‘li bilan undagi pullarni olib qo‘yib, haydovchini bo‘yin sohasidan bo‘g‘ib o‘ldiradi, — deyiladi Bosh prokuratura axborot xizmati xabarida.Qo‘shimcha qilinishicha, gumonlanuvchilar orasida 19 yoshli maktab o‘quvchisi ham bo‘lgan.
Aniqlashtirilishicha, 2022-yilning 14-oktabr kuni Toshkent viloyati prokuraturasi tomonidan 31 yoshli A.N. 19 yoshli fuqarolar — D.SH. va 11-sinf o‘quvchisi D.H.larga nisbatan Jinoyat kodeksining 97-moddasi 2-qismi “i” hamda “p” bandlari (tamagirlik niyatida bir guruh shaxslar yoki uyushgan guruh a’zosi tomonidan yoxud o‘sha guruh manfaatlarini ko‘zlagan holda qasddan odam o‘ldirish) bilan jinoyat ishi qo‘zg‘atilib, ular Jinoyat protsessual kodeksining 221-moddasi tartibida ushlangan.
Izoh (0)