Ukraina armiyasi kelasi haftadayoq Xerson viloyatidagi Dneprning g‘arbiy qirg‘og‘i ustidan nazoratni qayta qo‘lga kiritishi mumkin, deb yozadi “Agenstvo Novosti” G‘arb harbiylaridan iqtibos keltirgan holda.
Ukrainaning Xerson viloyatidagi hujumi avgust oyining oxiridan beri davom etmoqda. Shu paytdan boshlab mintaqaning shimolidagi front Xerson tomon 30 km dan ko‘proq siljidi. 13-oktabr kuni Ukraina Qurolli kuchlari aholi punktlari ozod qilingani haqida xabar berishda davom etdi. Ukraina qo‘mondonligiga ko‘ra, yana beshta aholi punkti ishg‘ol qilingan.
Britaniya razvedkasi 13-oktabr kuni ertalab Rossiya tomonidan tayinlangan hokimiyatning shahar aholisini evakuatsiya qilish qarori Xersonda yaqinlashib kelayotgan janglar xavfi bilan bog‘liqligini ma’lum qildi. “Oxirgi kunlarda Rossiya bosqinchilari Xersondan bir necha tinch aholini evakuatsiya qilishga tayyorgarlik ko‘rish haqida buyruq bergan bo‘lishi mumkin. Ular janglar Xerson shahrining o‘ziga ham tarqalishini kutishayotgandir”, — deya Britaniya Mudofaa vazirligi vakilining so‘zlarini keltiradi manba.
13-oktabr kuni Xerson viloyatining Moskva tomonidan tayinlangan rahbari Vladimir Saldo Rossiya rahbariyatiga mintaqa aholisining Rossiya viloyatlariga ketishiga yordam berish iltimosi bilan murojaat qildi va buni shaharga har kuni amalga oshirilayotgan raketa hujumlari bilan izohladi.
“Biz Xerson viloyatining barcha aholisiga, agar shunday istak bo‘lsa, o‘zlarini raketa zarbalari oqibatlaridan himoya qilish uchun boshqa hududlarga ham borishni taklif qildik. Bular, birinchi navbatda, Qrim, Rostov viloyati, Krasnodar va Stavropol o‘lkalaridir”, — dedi Saldo.
Tez orada Bosh vazir o‘rinbosari Marat Xusnullin hukumat Xerson viloyati ma’muriyatiga mintaqa aholisini boshqa hududlarga joylashtirishda yordam berishini ma’lum qildi. “Biz hammani bepul turar joy va barcha zarur narsalar bilan ta'minlaymiz”, — dedi u.
Xerson Ukrainadagi Rossiya urush boshidan beri egallab olgan yagona mintaqaviy markazdir. Sentyabr oyi oxirida The New York Times gazetasi harbiy qo‘mondonlar shaxsiy tarkib va harbiy texnikani saqlab qolish uchun Putindan Xersondan Dneprning narigi tomoniga chekinishga ruxsat so‘ragani haqida xabar bergan edi. Gazetaning yozishicha, Putin bu iltimosni rad etgan. “Bunday chekinish Putinning urushdagi mag‘lubiyatini yana bir kamsituvchi tan olish bo‘ladi va Ukrainaga bir oy ichida ikkinchi yirik g‘alabasini olib keladi”, — deb yozadi manba.
Izoh (0)