Қирғизистон Туркиянинг Акıнcı моделидаги Bayraktar тезкор-тактик ўрта баландликка парвоз қилувчи учувчисиз учар қурилмасини ўз арсеналига қабул қилиб олди. Бу ҳақда Қирғизистон Миллий хавфсизлик давлат қўмитаси раҳбари Қамчибек Ташиев Facebook’даги саҳифасида маълум қилди.
«Bayraktar Акинcи энди бизники. Қардош халқимизга раҳмат! 12.10.22-й», — дейилади постда.
Bayraktar дронининг Акинcи модели қанотлари қулочи 20 метрга етади. Максимал 4500 кг вазн билан уча олади. 24 соатгача парвоз қилади. Максимал тезлиги — 360 км/соат, оддий тезлиги — 240 км/соат.
Парвоз-техник хусусиятлари ва габаритлари бўйича Bayraktar Акинcи ўзидан аввалги Bayraktar ТB2 моделидан сезиларли даражада устун.
Айни пайтда Миллий хавфсизлик давлат қўмитаси ва президент маъмурияти матбуот хизмати қўмита раҳбари суратга тушириб жойлаган Bayraktar дронлари ҳақида маълумот беришдан бош тортди. Учувчисиз қурилмалар қандай шартлар билан ва қанча миқдорда сотиб олингани номаълум.
Ушбу дронларни ишлаб чиқарувчи Туркиянинг биринчи технологик компанияси — Baykar ИГ 12 октябрь куни Öздемир Bayraktar миллий технологик марказига қирғиз делегацияси ташриф буюргани ҳақида ёзган. Улар орасида Вазирлар маҳкамаси раҳбари Акилбек Жапаров, МХДҚ раҳбари Қамчибек Ташиев ҳам бўлган.
Қирғизистон МХДҚ чегара хизмати 13 сентябрь куни учувчисиз учар қурилмалар базасини ташкил қилди. У ерга Bayraktar дронлари жойлаштирилди, уларни бошқариш эса Чегара хизматининг тегишли тайёргарликдан ўтган офицерларига топширилган.
Ижтимоий тармоқларда тарқалган хабарларга кўра, Туркияда ишлаб чиқарилган зарбдор дронлар сентябрь ўрталарида Тожикистон билан чегарада юзага келган сўнгги зиддиятда қирғиз қўшинлари томонидан қўлланилган.
Изоҳ (0)