Belarusda aksilterrorchilik operatsiyasi rejimi joriy etildi. Bu haqda mamlakat tashqi ishlar vaziri Vladimir Makey “Izvestiya” gazetasiga bergan intervyusida ma’lum qildi.
Uning so‘zlariga ko‘ra, Ukraina “begunoh” ekanligini va Belarus bilan chegarada hech narsa rejalashtirmayotganini aytayotgan bo‘lsa-da, “dunyoda kutilmagan narsalar ko‘p bo‘lyapti”, shuning uchun Minsk “hech kimga ishona olmaydi”. Mamlakat o‘z xavfsizligi haqida qayg‘urishi va shunday qilishi kerakki, “yerimizning bir metr joyiga ham istilochining oyog‘i tegmasin”, dedi vazir.
“Mamlakatimiz rahbari xavfsizlik tuzilmalari bilan bir qator yig‘ilishlar o‘tkazdi, aksilterrorchilik operatsiyasi rejimi kiritildi, — dedi Makey. — Haqiqatan ham, ba’zi chegaradosh davlatlar tomonidan provokatsiyalar rejalashtirilayotgani, ular sal bo‘lmasa Belarusning alohida qismlarini egallab olish bilan bog‘liqligi haqida axborot kelib tushgandi”.
Tashqi siyosiy idora rahbari ta’kidlashicha, Belarus xavfsizlik kuchlari “chegaradosh davlatlar tomonidan amalga oshirilishi mumkin bo‘lgan har qanday provokatsiyalarga” javob qaytarishga tayyor.
10-oktabr kuni Belarus prezidenti Aleksandr Lukashenko mamlakat “norasmiy kanallar orqali” Ukraina tomonidan zarba berilishi haqida ogohlantirilganini aytgandi. Uning fikricha, bunday zarba “harbiylar nuqtai nazaridan tentaklik bo‘lgan bo‘lardi”, lekin “jarayon boshlangan”. “Agar ular iflos qo‘llari bilan Belarus hududining bir metriga ham teginadigan bo‘lsa”, yaqinda Qrim ko‘prigida bo‘lgan portlash “hech gap bo‘lmay qoladi”, deya ogohlantirdi Lukashenko.
Shuningdek, u da’vo qilishicha, Polsha bir necha soatlar ichida o‘z qo‘shinlarini Belarus chegaralariga joylashtirishi mumkin.
Lukashenkoning so‘zlariga ko‘ra, u “Ittifoq davlatining g‘arbiy chegaralarida vaziyat keskinlashgani munosabati bilan” Vladimir Putin bilan qo‘shma mintaqaviy qo‘shin guruhlarini kuchaytirish haqida kelishib olgan.
Belarusning Rossiya-Ukraina nizosiga munosabati
Rossiya Ukrainada 24-fevraldan buyon maxsus operatsiya olib bormoqda. Lukashenko Belarus nizoda qatnashmayotganini va qatnashishni rejalashtirmayotganini bir necha marta ta’kidlagan. “Tag‘in meni qandaydir hujumni rejalashtiryapti, Ukrainani Belarus hududidan bombardimon qilmoqchi deb o‘ylamang. Sizning va mening farzandlarimiz jang qilishini hech ham istamayman. Ular nimani deb jang qilishi kerak?” — degan edi u avgustda.Sentabrda Lukashenko Belarus o‘z hududi orqali Rossiya armiyasiga yashirincha zarba berilishiga yo‘l qo‘ymasligini ma’lum qildi. Keyinroq esa u Belarus hech kimga hujum qilmaganini va hujum qilmasligini aytdi va Ukrainada qon to‘kilishini to‘xtatish uchun hamma chorani ko‘rishga va’da berdi.
Keyinroq Aleksandr Lukashenko Belarus Rossiya Ukrainaga qarshi olib borayotgan “maxsus harbiy operatsiya”da qatnashayotganini, ammo o‘z harbiylarini ziddiyat hududiga yubormayotganini aytdi. “Ukrainadagi maxsus harbiy operatsiyadagi ishtirokimizga kelsak, biz unda qatnashyapmiz. Buni yashirmayapmiz. Lekin biz hech kimni o‘ldirmayapmiz. O‘z harbiylarimizni hech qayerga yubormayapmiz. Biz o‘z majburiyatlarimizni buzmayapmiz”, — dedi Lukashenko.
Izoh (0)