Tegishli ruxsat olinmagani ortidan Rossiya “Yamal” aviakompaniyasining Moskva—Namangan—Moskva yo‘nalishi bo‘yicha aviaqatnovi bekor qilingandi. Transport vazirligi holat yuzasidan batafsil ma’lumot berdi.
Unda aytilishicha, yo‘lovchilarning huquqlari va tashuvchining majburiyatlariga rioya etishni ta’minlash maqsadida “O‘zaviatsiya” agentligi tomonidan aviakompaniyalarga O‘zbekiston aeroportlariga charter reyslarini amalga oshirish uchun vakolatli organ “O‘zaviatsiya” agentligidan tegishli ruxsatnoma olmasdan turib aviachiptalarni sotish amaliyotini tugatish to‘g‘risida ogohlantirish xati yuborilgan.
“Yamal” aviakompaniyasi ushbu ogohlantirishga qaramay tegishli ruxsatnomani olmasdan turib, qo‘pol ravishda talablarni buzib, joriy yilning 13-oktabr kuniga Moskva—Namangan—Moskva yo‘nalishlarida charter parvozlari uchun aviachiptalar sotuvini tashkil etgan.
Natijada aviachiptada ko‘rsatilgan vaqtda yo‘lovchilar aerovokzallarga kelishgan va belgilangan yo‘nalishda parvozning bajarilmasligi yo‘lovchilar o‘rtasida ijtimoiy keskinlikka olib kelgan.
Shunga qaramay, vaziyatni inobatga olgan holda “O‘zaviatsiya” agentligi aviakompaniyaga zudlik bilan ushbu reysni amalga oshirishga ruxsat olish uchun so‘rovnoma berishni taklif qildi, biroq aviakompaniya ekipajning ish vaqti tugagani va boshqa ekipajlar yo‘qligi sabab parvozni amalga oshirishdan bosh tortgan.
Shu munosabat bilan “O‘zaviatsiya” agentligi tomonidan “Yamal” aviakompaniyasiga charter parvozlarni tashkillashtirishda O‘zbekiston talablariga qat’iy rioya etilishi shartligi to‘g‘risida ogohlantirish yuborilgan.
“Aviakompaniya tomonidan bunday holat takrorlangan taqdirda ‘O‘zaviatsiya’ agentligi tomonidan O‘zbekiston qonunchiligida belgilangan choralar ko‘riladi”, — deyiladi vazirlik xabarida.
Mavzuga doir:
Izoh (0)