Тегишли рухсат олинмагани ортидан Россия «Ямал» авиакомпаниясининг Москва—Наманган—Москва йўналиши бўйича авиақатнови бекор қилинганди. Транспорт вазирлиги ҳолат юзасидан батафсил маълумот берди.
Унда айтилишича, йўловчиларнинг ҳуқуқлари ва ташувчининг мажбуриятларига риоя этишни таъминлаш мақсадида «Ўзавиация» агентлиги томонидан авиакомпанияларга Ўзбекистон аэропортларига чартер рейсларини амалга ошириш учун ваколатли орган «Ўзавиация» агентлигидан тегишли рухсатнома олмасдан туриб авиачипталарни сотиш амалиётини тугатиш тўғрисида огоҳлантириш хати юборилган.
«Ямал» авиакомпанияси ушбу огоҳлантиришга қарамай тегишли рухсатномани олмасдан туриб, қўпол равишда талабларни бузиб, жорий йилнинг 13 октябрь кунига Москва—Наманган—Москва йўналишларида чартер парвозлари учун авиачипталар сотувини ташкил этган.
Натижада авиачиптада кўрсатилган вақтда йўловчилар аэровокзалларга келишган ва белгиланган йўналишда парвознинг бажарилмаслиги йўловчилар ўртасида ижтимоий кескинликка олиб келган.
Шунга қарамай, вазиятни инобатга олган ҳолда «Ўзавиация» агентлиги авиакомпанияга зудлик билан ушбу рейсни амалга оширишга рухсат олиш учун сўровнома беришни таклиф қилди, бироқ авиакомпания экипажнинг иш вақти тугагани ва бошқа экипажлар йўқлиги сабаб парвозни амалга оширишдан бош тортган.
Шу муносабат билан «Ўзавиация» агентлиги томонидан «Ямал» авиакомпаниясига чартер парвозларни ташкиллаштиришда Ўзбекистон талабларига қатъий риоя этилиши шартлиги тўғрисида огоҳлантириш юборилган.
«Авиакомпания томонидан бундай ҳолат такрорланган тақдирда ‘Ўзавиация’ агентлиги томонидан Ўзбекистон қонунчилигида белгиланган чоралар кўрилади», — дейилади вазирлик хабарида.
Мавзуга доир:
Изоҳ (0)