“5 soniyada pulingizni o‘g‘irlab, Afrikaga jo‘natib, yechib olishadi”. Shuhrat Qurbonov plastik karta ma’lumotlarini oshkor qilish oqibatlari haqida

“Daryo” internet-nashri hamda Toshkent shahri hokimligi qoshidagi Jamoatchilik kengashi hamkorligida tashkil etilgan “Mahalla. Muammo. Mulohaza” loyihasining 2-soni mehmoni — Telegram’dagi “Kurbanoff.net” kanali muallifi, iqtisodchi Shuhrat Qurbonov bo‘ldi. Ko‘rsatuvning bu galgi mavzusi — onlayn firibgarlik.

Ko‘rsatuv mehmonining ta’kidlashicha, hozir turli do‘konlar, xarid shoxobchalari, istalgan to‘lov nuqtalarida kassirlarga plastik karta raqamlarini aytmaslik kerak. Buning o‘rniga, terminalda karta pin-kodini fuqaroning o‘zi kiritishi kerak.

Hozir farqi yo‘q, chet el kartasimi yo milliy kartami, 5 soniyada pulingizni yechib olib, Afrikadagi bir davlatga o‘tkazib, u yoqdan AQSHga o‘tkazib, u yoqdan yana bir davlatga urib, naqdlashtirishlari mumkin. Chunki texnologiyalar o‘zgarib ketgan.

Umuman tutib ololmay qolasiz. Negaki, bu xalqaro firibgarlik darajasiga chiqqan, katta pul aylanadi. Telefon qilishadi, Click’danman, PayMe’danman, Oson’danman, Call-center’danman deb. E’tirob bersangiz, ko‘pincha ruscha gapirishadi, ko‘pincha aksent bilan gaplashishadi. Yo rossiyalik, yo ukrainalik bo‘lib chiqadi-da.

Ya’ni, bu xalqaro masshtabdagi masala. Ularga farqi yo‘q, pul qaysi davlatdan kelayotganining. Ular o‘ziga bitta ssenariy qilib oladi, guruhga tarqatishadi va shu bo‘yicha ishlaydi, — deydi Shuhrat Qurbonov.