“Daryo” internet-nashri hamda Toshkent shahri hokimligi qoshidagi Jamoatchilik kengashi hamkorligida tashkil etilgan “Mahalla. Muammo. Mulohaza” loyihasining 2-soni mehmoni — Telegram’dagi “Kurbanoff.net” kanali muallifi, iqtisodchi Shuhrat Qurbonov bo‘ldi. Ko‘rsatuvning bu galgi mavzusi — onlayn firibgarlik.
Shuhrat Qurbonovning ta’kidlashicha, internet tarmoqlaridagi firibgarliklar, turli moliyaviy jinoyatlarning oldini olish uchun, eng avvalo, onlayn to‘lov tizimlari, plastik kartalarga bo‘lgan munosabatimizni to‘g‘rilashimiz zarur.
Moliyaviy tushunchalarimizni o‘zgartirishimiz kerak. Ya’ni, plastik karta bu — hamyon. Xuddi o‘sha ichida naqd pulingiz turadiganday, bu ham hamyon. Faqat bitta farqi — plastik kartada odamlarning bor-yo‘q puli turadi. Masalan, oyligi tushadi, hammasi kartada turadi. Xudo ko‘rsatmasin, kartani yo‘qotib qo‘ysangiz, siz umuman pulsiz qolib ketishingiz mumkin. Oddiy hamyonda esa ichida 100 ming so‘m bo‘lsa, shu pul yo‘qoladi, qolgani uyda turgan bo‘ladi.Shuning uchun kartaga bo‘lgan qarashimizni ozgina o‘zgartirsak, bu firibgarlarga qarshi eng birinchi harakatimiz bo‘ladi.
Asosiy tushuncha shunaqaki, plastik karta qulf ostida turishi kerak. Pin-kod yoki SMS-kod — bu sizning kalitingiz, — deydi iqtisodchi.
Ko‘rsatuvni to‘liq tarzda “Daryo”ning YouTube’dagi sahifasi orqali tomosha qilish mumkin.
Izoh (0)