Ozarbayjon prezidenti Ilhom Aliyev yil oxirigacha Armaniston bilan tinchlik shartnomasi imzolanishi mumkinligini aytdi va bu arman tomonining xohishiga ham bog‘liqligini ta’kidladi.
Vaqt ketyapti. Tashqi ishlar vazirlarining birinchi uchrashuvi muvaffaqiyat keltirmagan bo‘lsa-da, bu ijobiy qadam, deb o‘ylayman. Agar yaqin orada qaror qabul qilinsa, tomonlar tinchlik shartnomasi matni ustida ish boshlasa, yil oxiriga qadar kelishuvga erishishimiz mumkin, — dedi Aliyev Ozarbayjon telekanallariga bergan intervyusida.Uning so‘zlariga ko‘ra, Ozarbayjon taklif qilgan tinchlik shartnomasining beshta asosiy tamoyili bo‘yicha Armaniston va Yevropa Ittifoqida hech qanday savol yo‘q.
Bu tabiiy, chunki biz yangi hech narsa o‘ylab topmayapmiz. O‘zaro munosabatlarni normallashtirish istagida bo‘lgan davlatlar shu (Ozarbayjon taklif qilayotgan — “Daryo” izohi) tamoyillarga asoslanadi, — dedi Aliyev.Kecha, 6-oktabr kuni Ilhom Aliyev Pragada Armaniston bosh vaziri Nikol Pashinyan bilan uchrashdi. Uchrashuvda Turkiya prezidenti Rajab Toyyib Erdo‘g‘on ham ishtirok etdi. Bu Turkiya va Armaniston yetakchilarining ilk yuzma-yuz ko‘rishishi bo‘ldi. Erdo‘g‘on Armaniston bosh vaziri bilan uchrashuvi “ijobiy muhitda” o‘tganini aytdi. Pashinyan Ozarbayjon bilan tinchlik shartnomasini imzolash imkoniyati haqida hozircha izoh bermadi.
Izoh (0)