AQSH prezidenti Jo Baydenning fikricha, Vladimir Putin Ukrainada taktik yadro qurolidan foydalanish ehtimoli haqida gapirganda “hazillashmayapti”. Baydenning so‘zlariga ko‘ra, dunyo 1962-yildagi Karib dengizi inqirozidan keyin birinchi marta yadro qurolidan foydalanish tahdidiga duch kelmoqda.
Ma’lumot uchun Karib inqirozi — 1962-yil oktabr oyida AQSH va SSSR o‘rtasida yuzaga kelgan siyosiy, diplomatik va harbiy qarama-qarshilikning nomi. Bunga AQSHning Turkiyadagi bazaga, Moskvaning esa Kubaga yadro quroli joylashtirgani sabab bo‘lgan. Vaziyat Sovet Ittifoqi Kommunistik partiyasi Markaziy komiteti birinchi Kotibi Nikita Xrushchov va AQSH prezidenti Jon Kennedi o‘rtasidagi suhbat orqali hal qilingan.
Bayden Rossiya prezidenti Vladimir Putinni “yaxshi” bilishini aytdi.
“U taktik yadro qurollari, biologik yoki kimyoviy qurollardan foydalanish ehtimoli haqida gapirganda hazillashmaydi”, — dedi AQSH prezidenti.
Bayden taktik yadro qurolidan foydalanish tezda nazoratdan chiqib ketishi va global halokatga olib kelishi mumkinligidan ogohlantirdi. U AQSH diplomatik yechim izlayotganini qo‘shimcha qildi.
Rossiya Ukrainaga bostirib kirganidan keyin Rossiya prezidenti Vladimir Putin, hukumat amaldorlari va targ‘ibotchilar Rossiya yadro qurolidan foydalanishi mumkinligiga qayta-qayta ishora qildi. 21-sentabr kuni Putin safarbarlik boshlanishi haqidagi murojaatida Rossiya hukumati o‘z hududlarini himoya qilish uchun “ixtiyoridagi barcha vositalarni” ishga solishga tayyorligini aytdi.
Izoh (0)