Zaporojye shahriga 6-oktabr tongida uyushtirilgan raketa hujumi oqibatida 11 kishi halok bo‘lgani aniqlandi. Yana 21 kishi turar joy binolari vayronalari ostidan qutqarib olindi. Bu haqda Ukraina favqulodda vaziyatlar davlat xizmati xabar berdi.
Qutqaruvchilarning so‘zlariga ko‘ra, Zaporojyeda kamida ikkita uy vayron bo‘lgan. Besh qavatli bino vayronalari ostidan qutqaruvchilar sakkiz kishining jasadini olib chiqdi, shuningdek, olti kishini tirik chiqarib oldi, ulardan besh nafari kasalxonaga yotqizildi.
To‘rt qavatli bino vayronalari ostidan esa 3 nafar jasad topildi. 15 kishi qutqarib olindi, ulardan sakkiz nafari kasalxonaga yotqizildi.
Vayronalarni tozalash davom etmoqda. Ishga Favqulodda vaziyatlar davlat xizmatining 45 nafar xodimi va 12 ta texnikasi, shuningdek, 5 ta xo‘jalik texnikasi jalb qilingan.
6-oktabr kuni ertalab Ukraina hukumati mamlakat nazorati ostidagi Zaporojye shahriga 7 ta raketa kelib tushgani haqida xabar bergandi. Snaryadlar uylarga teggan. Zaporojye viloyati harbiy boshqarmasi boshlig‘i Aleksandr Starux hujumda rossiyalik harbiylarni aybladi.
Izoh (0)