Yaponiya Rossiyaning 80 dan ortiq fuqarosi va to‘qqizta tashkilotiga nisbatan sanksiyalar joriy qildi. Bu haqda Yaponiya Moliya vazirligi ma’lumotlariga tayanib, “RBK” xabar berdi.
Yaponiya sanksiyalari ostiga Checheniston rahbari Ramzan Qodirov, Rossiya Mudofaa vazirligi rahbari Sergey Shoygu, bosh vazir Mixail Mishustin va Xavfsizlik kengashi raisi o‘rinbosari Dmitriy Medvedevning oila a’zolari tushgan. Jumladan:
- Ramzan Qodirovning qizlari Ayshat Qodirova (Checheniston madaniyat vaziri), Xadijat Qodirova (Grozniy maktabgacha ta’lim boshqarmasi boshlig‘i) va Tabarik Qodirova;
- Ramzan Qodirovning rafiqasi Medni Qodirova;
- chechen go‘zallik tanlovlari ishtirokchisi Fotima Xazuyeva va qo‘shiqchi Aminat Ahmadova (ular Qodirovga yaqin doirada deb hisoblanadi);
- Sergey Shoyguning rafiqasi Irina Shoygu, qizlari Kseniya Shoygu (Rossiya triatlon federatsiyasi prezidenti) va Yuliya Shoygu (Favqulodda vaziyatlar vazirligining Shoshilinch psixologik yordam markazi direktori);
- Mixail Mishustinning rafiqasi Vladlena Mishustin, o‘g‘illari Aleksey va Aleksandr Mishustin;
- Dmitriy Medvedevning rafiqasi Svetlana Medvedeva va o‘g‘li Ilya Medvedevga qarshi sanksiyalar joriy qilingan.
Rossiyaning Ukrainadagi bosqini boshlanganidan so‘ng, Yaponiya Rossiyaga qarshi bir nechta sanksiyalar paketini joriy qildi, bu, xususan, jismoniy shaxslar, kompaniyalar, bank sektori, shuningdek, eksport va importga ta’sir ko‘rsatdi.
Mamlakat, xususan, Rossiyadan ko‘mir, avtomobillar, aroq va ayrim turdagi yog‘ochlarni import qilishni taqiqladi. Bundan tashqari, Tokio Rossiyaga “sanoat infratuzilmasini mustahkamlashga yordam beradigan” mahsulotlar: po‘lat baklar, konveyerlar, samosvallar, buldozerlar, dastgohlar va boshqalarni eksport qilishni taqiqladi.
Izoh (0)