Prezident administratsiyasi qoshidagi ishchi guruh ta’lim sifatini oshirish, zamonaviy dasturlar, yangi o‘quv qo‘llanmalarini yaratish ishlarini boshlagandi. Komil Allamjonov barcha boshlang‘ich sinf o‘qituvchilarini aprobatsiya ishlarida faol bo‘lishga chaqirdi.
“Xalq ta’limi vazirligi tez kunlarda 1-2 sinf uchun o‘quv dasturlar, yangi metodika va darsliklarni aprobatsiyasini boshlamoqda. Finlyandiyalik mutaxassislar ekspertizasidan o‘tayotgan va tasdiqlanayotgan ushbu darsliklar o‘ylaymanki O‘zbekiston ta’lim sohasini tubdan yuqori sifat darajasiga ko‘tarishga xizmat qiladi”, — dedi u va ertangi kun uchun befarq bo‘lmagan barcha boshlang‘ich sinf o‘qituvchilarini aprobatsiya ishlarida faol bo‘lishga chaqirdi.
Allamjonovning ta’kidlashicha, maktab binolari kerak va zarur, sifatli darsliklar yaratish esa undan-da zarur.
“Men har doim bir gapni aytib kelaman. Albatta maktab binolari kerak va zarur lekin undan ham oldin sifatli darsliklar, oddiy aytganda ta’lim olish uchun kontent yaratish undan-da zarur. Maktab binolarini qasr qilib qurib qo‘ying, lekin shunga yarasha o‘qitish uchun zamonaviy kontent bo‘lmasa bu shunchaki bir tiyinga qimmat beton bo‘ladi xolos. Agar kontent sifatli, zamonaviy va kuchli bo‘lsa, bola palatkada o‘tirib o‘qisa ham bilimli bo‘laveradi. Aytmoqchi bo‘lganim shuki, prioritetlarni to‘g‘ri belgilash kerak”, — deydi Prezident administratsiyasi rahbari o‘rinbosari.
Aprobatsiya ishlarida qatnashish istagidagi o‘qituvchilar talim2023.uz veb-sayti yoki @talim2023_bot Telegram boti orqali ro‘yxatdan o‘tib, ma’lumot qoldirishi mumkin.
Mavzuga doir: Komil Allamjonov maktab darsliklari bo‘yicha muammo va yechimlar haqida murojaatlar yo‘llashni so‘radi
Izoh (0)