Qozog‘iston Milliy volontyorlar tarmog‘i va mamlakat Fuqarolik alyansi bo‘lajak prezidentlik saylovlarida Qosim-Jo‘mart To‘qayevni nomzod sifatida ko‘rsatish tashabbusi bilan chiqdi. Bu haqda Kazinform’ga tayanib “RBK” xabar berdi.
“Biz Milliy volontyorlar tarmog‘ining umumiy yig‘ilishini o‘tkazmoqdamiz, unda tarmog‘imizga kiruvchi barcha ko‘ngilli tashkilotlar nomidan amaldagi davlat rahbari Qosim-Jo‘mart To‘qayev nomzodini ko‘rsatish tashabbusini ko‘rsatmoqchimiz”, — deyiladi tarmoq bayonotida.
Tashkilot raisi Vera Kimning fikricha, To‘qayev nomzodini qo‘llab-quvvatlash mamlakatda amalga oshirilayotgan “keng ko‘lamli islohotlar” uchun zarur.
Tashabbus Fuqarolar alyansi tomonidan ham qo‘llab-quvvatlandi. Tashkilotning 26 nafar a’zosidan barchasi To‘qayev nomzodi uchun ovoz berdi.
21-sentabr kuni To‘qayev Qozog‘istonda prezidentlik saylovini o‘tkazish to‘g‘risidagi farmonni imzolagan edi. Avvalroq davlat rahbari mamlakat siyosiy tizimini isloh qilgan: yangi konstitutsiyaga ko‘ra, prezident yetti yilga va faqat bir muddatga saylanadi.
Izoh (0)