Ukraina harbiylari Rossiya qo‘shinlari tomonidan egallab olingan Xerson viloyatida yana sakkizta aholi punktini ozod qildi. Bu haqda Ukraina prezidenti Vladimir Zelenskiy urushning 223-kuni yakunlariga bag‘ishlangan videomurojaatida aytib o‘tdi.
“Lyubimovka, Kreshchenovka, Zolotaya Balka, Belyayevka, Ukrainka, Katta va Kichik Aleksandrovkalar hamda Davidov Brod aholi punktlari istilochilar qo‘lidan ozod etildi va barqarorlashtirildi. Bu hali to‘liq ro‘yxat emas. Bizning jangchilarimiz to‘xtab qolmayapti. Istilochini o‘z yerimizdan quvib chiqarishimiz — vaqt masalasi, xolos”, — dedi prezident.
Shu hafta Xerson viloyatidan tashqari, Xarkov, Lugansk va Donetsk viloyatlaridagi shahar va qishloqlar ham “Rossiyaning soxta referendumidan ozod etildi”, dedi Zelenskiy. Uning so‘zlariga ko‘ra, gap ozod qilingan o‘nlab aholi punktlari haqida bormoqda.
Shuningdek, prezident ma’lum qilishicha, Ukraina armiyasi mamlakat janubida “ancha tez va shiddatli tarzda” olg‘a ketishda davom etmoqda.
4-oktabr kuni Ukraina prezidenti ofisi rahbari o‘rinbosari Kirill Timoshenko Donetsk, Lugansk, Nikolayev, Xarkov va Xerson viloyatlarida 1534 ta aholi punkti ozod etilib bo‘lganini ma’lum qildi. O‘z navbatida, Ukraina ichki ishlar vaziri o‘rinbosari Yevgeniy Yenin Xerson viloyatining o‘zida 50 ta aholi punkti ozod qilinganini aytdi.
Shu kuni Rossiya Mudofaa vazirligi Ukrainadagi jangovar harakatlar xaritasini namoyish qildi, unga ko‘ra, Xerson viloyatida front chizig‘i taxminan 30 kilometrga janubga siljigan.
Izoh (0)