Эрон Украинанинг Луганск, Донецк, Херсон ва Запорожье вилоятларида ўтказилган «референдумлар»ни ҳамда бу вилоятларнинг Россияга қўшиб олинишини тан олмайди. Бу ҳақда мамлакат Ташқи ишлар вазирлиги матбуот котиби Носир Кенани матбуот анжуманида маълум қилди.
Унинг сўзларига кўра, Эрон ҳар доим мамлакатларнинг ҳудудий яхлитлиги тамойилига ҳамда БМТ Низоми тамойиллари ва мақсадларига тўлиқ ҳурмат кўрсатиш зарурлигини таъкидлаб келади.
Кенани шунингдек, Эрон Украинага қарши урушда фойдаланиш учун Россияга жанговар дронлар етказиб бераётганини рад этди.
«Эрон Ислом республикаси Украина можаросида фойдаланиш учун Россияга дронлар етказиб берилаётгани ҳақида тарқалган хабарларни асоссиз деб ҳисоблайди ва уларни тасдиқламайди», — деди вазирлик матбуот котиби.
Август ойида Эрон Россияга жанговар дронларнинг биринчи партиясини юборгани ҳақида маълумот пайдо бўлганди.
Сентябрь ойида Россия кучлари Украинанинг орқа шаҳарларига ҳужум қилиш учун Shahed-136 камикадзе-дронларидан оммавий равишда фойдаланишни бошлаган.
Изоҳ (0)