Mark Sukerbergning shaxsiy boyligi bir yil ichida ikki barobardan ko‘proqqa qisqardi, bu esa unga eng badavlat amerikaliklar 10 taligiga kirishiga to‘sqinlik qildi. Sukerberg bu yil 11-o‘rinni egalladi. Bu haqda Forbes xabar bermoqda.
2015-yildan beri birinchi marta Meta (Facebook) asoschisi Mark Sukerberg eng boy 10 amerikalik qatoriga kirmadi.
2021-yil sentyabr oyidan beri Sukerberg boyligining yarmidan ko‘pini yo‘qotdi — 76,8 million dollar va Forbes’ning 400 ta amerikalik eng boy odamlar ro‘yxatida uchinchidan 11-o‘ringa tushdi.
2-sentyabrdagi kotirovkalarga ko‘ra, Sukerbergning boyligi 57,7 milliard dollarga baholanmoqda. O‘tgan bir yil davomida Amerikadagi eng badavlat kishilar ro‘yxatida hech kim Sukerberg kabi zarar ko‘rmagan.
Uning kuchli o‘ntalikdan ketishiga Meta (Facebook) aksiyalarining tushib ketgani sabab bo‘ldi. O‘tgan yilgi Forbes 400 reytingi e’lon qilinganidan beri kompaniya aksiyalari 57 foizga tushib ketdi.
Shu bilan birga, Microsoft 14 foizga, Alphabet 25 foizga, Amazon’ning aksiyalari esa 27 foizga pasaygan.
Iyul oyida Meta kompaniya tarixida birinchi marta choraklik daromadning kamayishi haqida xabar berdi: 1 foizga — 28,8 milliard dollargacha.
O‘tgan yili Apple’ning maxfiylik siyosati yangilanishi investorlarni to‘xtatib qo‘ydi, bu texnologiya kompaniyalariga boshqa ilovalardagi foydalanuvchi faolligini kuzatishga to‘sqinlik qiladi va bu Meta’ning reklama daromadiga ta’sir qiladi.
Facebook reklamadan katta pul topadi, hozir esa unda bunday ma’lumotlar yo‘q, — deydi Benchmark tadqiqot va investitsiya firmasi tahlilchisi Mark Zgutovich.
Fevral oyida Meta birinchi marta kundalik faol foydalanuvchilarning kamaygani haqida xabar berdi.
Oddiy sharoitlarda, daromadning ozgina pasayishini tuzatish mumkin edi, ammo Meta virtual haqiqat va metaversega katta sarmoya kiritmoqda va bu operatsion foydani kamaytiradi.
2021-yilda kompaniyaning metaverse bo‘limi Meta Reality Labs 10 milliard dollar zarar ko‘rdi.
Metaverse uzoq muddatli investitsiya. Hozircha bu ko‘proq zarar ko‘ruvchi korxona, — deydi Zgutovich.
Sukerberg ilk bor 2008 yilda, Facebook ijtimoiy tarmog‘iga asos solganidan atigi to‘rt yil o‘tib milliarderga aylandi. 23 yoshida u o‘sha paytdagi eng yosh milliarder edi va 1,5 milliard dollar boyligi bilan Forbes 400’da 321-o‘rinni egallagan. 2011-yilga kelib esa Sukerbergning boyligi qariyb 12 barobar o‘sdi va 17,5 milliard dollarga yetdi.
Sukerberg boyligining birinchi marta bunday tushib ketayotgani yo‘q. Facebook’ning 2012-yildagi mashhur IPO’sidan so‘ng Sukerberg The Forbes 400 reytingida 14-o‘rindan 36-o‘ringa tushib ketgan. Ammo bu uzoqqa cho‘zilmagan.
Keyingi yili Sukerberg o‘z pozitsiyasiga qaytdi va hozirgacha uning boyligi faqat o‘sib bordi. Kompaniya bir qator muammolarga duch kelganiga qaramay, Facebook doimiy ravishda investorlarni hayratda qoldirish uchun yetarli mablag‘ ishlab chiqardi.
Sukerbergning boyligi esa o‘tgan yili 134,5 milliard dollarga ko‘tarildi, bu uning hozirgacha bo‘lgan rekordi.
Kelgusi yil nima bo‘ladi?
Forbes hisob-kitoblariga ko‘ra, Sukerbergning deyarli barcha boyligi Meta aksiyalarida ya’ni u metaverse uchun kompaniyaning uzoq muddatli istiqbollarini (va o‘zining ulkan boyligini) xavf ostiga qo‘yishga tayyor.
U dastlabki qiyinchiliklarni yengib o‘tadimi yoki yo‘qmi hali aniq emas. O‘tgan oy Meta’ning yangi virtual reallik ijtimoiy tarmog‘i Horizon Worlds’da Sukerberg selfi joylashtirganida uni masxara qilishgan.
Keyinroq u surat “anchalik ibtidoiy” ekanligini tan olib, yaqin kelajakda grafikani yaxshilashga va’da bergan. O‘shandan beri Meta aksiyalari 8 foizga tushib ketdi.
Izoh (0)