Yadro energetikasi insoniyatning yutug‘idir, undan xalqaro kurash quroli sifatida emas, balki faqat tinch maqsadlarda foydalanish kerak, dedi Qozog‘iston prezidenti Qosim-Jo‘mart To‘qayev Sharqiy Qozog‘iston viloyatidagi Semey shahriga safari davomida qilgan chiqishida.
“Xalqaro munosabatlarda misli ko‘rilmagan geosiyosiy keskinlashuv kuzatilmoqda, dunyoning turli burchaklarida siyosatchilar va ekspertlar yadro qurolidan foydalanish xavfini jiddiy muhokama qilmoqda”, — deb eslatdi Qozog‘iston prezidenti. Biroq uning fikricha, atom energiyasi insoniyatning ajoyib yutug‘idir.
“Bu faqat xalqlar va mamlakatlar manfaati uchun ishlashi kerak, xalqaro kurashning buzg‘unchi quroli bo‘lmasligi kerak”, — dedi To‘qayev.
To‘qayev Semey yadro poligonidagi so‘nggi portlashdan deyarli 33 yil o‘tganini, poligon mamlakatning birinchi prezidenti Nursulton Nazarboyev qarori bilan yopilganini eslatdi. “Bu mintaqa aholisi sovuq urush davrida o‘ylanmay qilingan yadroviy qurollanish poygasining barcha qiyinchiliklarini boshidan kechirdi”, — dedi To‘qayev.
Uning fikricha, hozirgi inqiroz oqibatlari barcha mamlakatlar uchun halokatli bo‘lishi mumkin.
“Insoniyat kelajagi uchun umumiy mas’uliyatni anglash, xalqaro huquqning belgilangan tamoyillariga rioya qilish, davlatlarning o‘zaro manfaatlarini hurmat qilish asosidagina undan chiqish yo‘li mumkin”, – dedi Qozog‘iston rahbari.
Yadro qurolidan foydalanish haqidagi munozaralar Rossiyaning Ukrainadagi bosqini bilan bog‘liq. Urush boshlanganidan uch kun o‘tgach, Rossiya yadroviy tiyib turuvchi kuchlarini maxsus jangovar navbatchilik rejimiga o‘tkazdi. Biroq Rossiya prezidenti matbuot kotibi Dmitriy Peskov Moskva mojaroda yadro qurolidan foydalanish imkoniyatini ko‘rib chiqmayotganini aytgan.
Izoh (0)