Suriyaning 10 ta viloyatida vabo avj oldi va butun mamlakat bo‘ylab tarqalib bormoqda, vaziyat xavotir uyg‘otyapti, deya ma’lum qildi Jahon sog‘liqni saqlash tashkiloti (JSST)ning Vabo va epidemik diareya kasalliklari bo‘yicha guruhi rahbari Filipp Barboza.
“28-sentabr holatiga Suriya Sog‘liqni saqlash vazirligi o‘nta viloyatda vabo avj olganini ma’lum qildi, 426 kishida kasallik aniqlanib, shularning 33 nafari vafot etgan. Kasallik tarqalgan hududlarda vaziyat tashvishga soladigan darajada tez rivojlanmoqda va yangi-yangi hududlarga tarqalmoqda”, — dedi u Jenevada BMT brifingi chog‘ida.
Avvalroq Suriya SSV ko‘pchilik hollarda bemorlarning o‘limi ular tibbiy muassasalarga juda kech murojaat qilgani yoki surunkali kasalliklardan aziyat chekkani bilan bog‘liq bo‘lganini qayd etgandi.
Shuningdek, OAVlarda paydo bo‘lgan xabarlarga ko‘ra, Idlib viloyatidagi tekshiruvlar doirasida oqova suvlarda va muz bo‘laklari ishlab chiqarish bo‘yicha zavodda vabo namunalari aniqlangan, shundan keyin muassasa tezlikda yopib tashlangan. Nashrlar ma’lumotlari bo‘yicha kasallik avj olishiga Frot daryosidan suv olinishi sabab bo‘lgan bo‘lishi mumkin. Daryo kuchli darajada ifloslangan bo‘lib, aholi bevosita daryoning o‘zidan yoki toza suv sotishga mo‘ljallangan yuk mashinalari orqali undan suv oladi.
Vaboning avj olishi ko‘p yillar ichida birinchi marta kuzatilmoqda.
Mavzuga doir:
- O‘zbekistonda vabo aniqlangani haqidagi xabarga izoh berildi
- Xitoyda bubon vabosi bilan kasallanish holati qayd etildi
- O‘zbekistonda vabo kasalligining chetdan kirib kelishini oldini olishda qanday choralar ko‘rilayotgani ma’lum qilindi
- Afg‘oniston janubida vabo kasalligi oqibatida bir kecha-kunduzda 40 kishi vafot etdi
Izoh (0)