Ядро энергетикаси инсониятнинг ютуғидир, ундан халқаро кураш қуроли сифатида эмас, балки фақат тинч мақсадларда фойдаланиш керак, деди Қозоғистон президенти Қосим-Жўмарт Тўқаев Шарқий Қозоғистон вилоятидаги Семей шаҳрига сафари давомида қилган чиқишида.
«Халқаро муносабатларда мисли кўрилмаган геосиёсий кескинлашув кузатилмоқда, дунёнинг турли бурчакларида сиёсатчилар ва экспертлар ядро қуролидан фойдаланиш хавфини жиддий муҳокама қилмоқда», — деб эслатди Қозоғистон президенти. Бироқ унинг фикрича, атом энергияси инсониятнинг ажойиб ютуғидир.
«Бу фақат халқлар ва мамлакатлар манфаати учун ишлаши керак, халқаро курашнинг бузғунчи қуроли бўлмаслиги керак», — деди Тўқаев.
Тўқаев Семей ядро полигонидаги сўнгги портлашдан деярли 33 йил ўтганини, полигон мамлакатнинг биринчи президенти Нурсултон Назарбоев қарори билан ёпилганини эслатди. «Бу минтақа аҳолиси совуқ уруш даврида ўйланмай қилинган ядровий қуролланиш пойгасининг барча қийинчиликларини бошидан кечирди», — деди Тўқаев.
Унинг фикрича, ҳозирги инқироз оқибатлари барча мамлакатлар учун ҳалокатли бўлиши мумкин.
«Инсоният келажаги учун умумий масъулиятни англаш, халқаро ҳуқуқнинг белгиланган тамойилларига риоя қилиш, давлатларнинг ўзаро манфаатларини ҳурмат қилиш асосидагина ундан чиқиш йўли мумкин», – деди Қозоғистон раҳбари.
Ядро қуролидан фойдаланиш ҳақидаги мунозаралар Россиянинг Украинадаги босқини билан боғлиқ. Уруш бошланганидан уч кун ўтгач, Россия ядровий тийиб турувчи кучларини махсус жанговар навбатчилик режимига ўтказди. Бироқ Россия президенти матбуот котиби Дмитрий Песков Москва можарода ядро қуролидан фойдаланиш имкониятини кўриб чиқмаётганини айтган.
Изоҳ (0)