Сирдарё вилоятининг Янгиер шаҳрига Отабек Носиров ҳоким этиб тайинланди. Бу ҳақда вилоят ҳокимлиги матбуот хизмати хабар берди.
Маълум қилинишича, халқ депутатлари Янгиер шаҳар кенгашининг 28 сентябрь куни бўлиб ўтган навбатдан ташқари сессиясида 2019 йилдан буён Сирдарё вилояти ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари лавозимида ишлаб келган Отабек Носиров Янгиер шаҳар ҳокими лавозимига тайинланган.
Шаҳарнинг аввалги ҳокими Элёр Хўжаев бетоблик туфайли 2022 йилнинг июлида вафот этганди.
Отабек Носиров 1976 йилда туғилган, маълумоти олий. 1999 йилда Жиззах политехника институтини, 2007 йилда Ўзбекистон Республикаси Президенти ҳузуридаги давлат ва жамият қурилиши академиясини тамомлаган.
«Отабек Носиров вилоят ҳокими ўринбосари сифатида фаолият юритган даврида бир қатор ижобий ишлар амалга оширди. Тўплаган иш тажрибаси орқали Янгиер шаҳрининг драйвер йўналишларини яхши билади, шаҳарни ижтимоий-иқтисодий ривожлантириш бўйича астойдил меҳнат қилади, деган умиддамиз», — дея ишонч билдирган вилоят ҳокими Ғофуржон Мирзаев.
«Раҳбарга энг аввало халқ баҳо беради. Элёр Хўжаев ҳам ёмон фаолият олиб бормади. Шаҳарни ободонлаштириш, аҳолининг турмуш фаровонлигини ошириш йўлида кўзга ташланарли ишлар қилди. Энг муҳими, талабчан ва ҳаракатчан, мулоҳаза билан иш кўрадиган, узоқни кўра оладиган ёш раҳбарлардан бири эди. Лекин умри қисқа экан», — деган вилоят ҳокими.
Изоҳ (0)