Toshkentda ikki kishini soxta hujjat bilan OTMga kiritib qo‘ymoqchi bo‘lgan shaxs ushlandi

Farg‘ona, Jizzax viloyatlari va Toshkent shahrida pul evziga o‘qishga kiritib qo‘yishni va’da qilgan shaxslar ushlandi.

Bosh prokuratura huzuridagi Departamentning Toshkent shahar boshqarmasi tomonidan DXX xodimlari bilan hamkorlikda o‘tkazilgan tezkor tadbirda, fuqaro M.R. ikki nafar fuqaroni go‘yoki “S.R.” MCHJ yordamida 9 600 dollar evaziga qo‘shni Tojikistondagi universitetning 1-kursini ta’momlagani haqida soxta hujjat tayyorlab berish orqali Toshkent shahridagi OTMlarning biriga 2-kursiga o‘qishga kiritib qo‘yishni va’da qilib, oldindan 5 000 dollarni olgan vaqtida ashyoviy dalillar bilan ushlangan.

Shu kabi, departament hamda DXXning Jizzax viloyati boshqarmalari tomonidan o‘tkazilgan tezkor tadbirda, Abu Ali ibn Sino nomidagi Jizzax jamoat salomatligi texnikumi direktori o‘rinbosari J.T., fuqaro Sh.ni ushbu texnikumiga o‘qishga kiritib qo‘yish evaziga 500 dollarni olgan vaqtida ashyoviy dalillar bilan ushlangan.

Toshloq tuman bo‘limi tomonidan DXX xodimlari bilan hamkorlikda o‘tkazilgan tezkor tadbirda esa, 2-Marg‘ilon Abu Ali ibn Sino nomidagi Jamoat salomatligi texnikumi yoshlar yetakchisi R.X. va talaba M.K. fuqaro I.ni tanishlari yordamida ushbu texnikumga o‘qishga kiritib qo‘yish evaziga 450 dollarni olgan vaqtida ashyoviy dalillar bilan ushlangan.

Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.

Mavzuga doir:

• Sirdaryoda pul evaziga oliygoh diplomini olib bermoqchi bo‘lgan shaxslar ushlandi
• O‘qishni Iqtisodiyot universitetiga ko‘chirib berish evaziga fuqarodan 3700 dollar olgan shaxs ushlandi