“Daryo” nashri 27-sentabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Rossiya Mudofaa vazirligi safarbarlik doirasida fuqarolarning harakatlanishi cheklanmasligini ma’lum qildi. Biroq chegarachilar rossiyaliklarga chiqishni taqiqlashni boshlagan
Rossiya hukumati tomonidan e’lon qilingan safarbarlik mamlakat fuqarolarining harakatlanishi cheklanishini nazarda tutmaydi. Bu haqda mamlakat Mudofaa vazirligi ma’lum qildi.
“Rossiya Mudofaa vazirligi oydinlik kiritadi: Rossiya Federatsiyasida qisman safarbarlik o‘tkazilishi sharoitlarida fuqarolarning harakatlanishiga nisbatan cheklovlar nazarda tutilmaydi”, — deyiladi idoraning rasmiy Telegram-kanalida. Mudofaa vazirligi bayonotida gap Rossiya ichkarisida harakatlanish haqida yoki chet elga safarlar haqida borayotgani noaniq. Idora bu borada batafsil izohlar bermagan.
25-sentabrdan chaqiriq yoshidagi erkaklar chegaradan chiqarilmayotgani haqida alohida xabarlar paydo bo‘la boshladi. Chegarachilar o‘z xatti-harakatlarini safarbarlik to‘g‘risidagi qonun bilan izohlamoqda. Huquqshunoslar bunday harakatlarni qonunga zid deb baholamoqda.26-sentabr kuni aeroportlardagi chegarachilarga safarbarlikka jalb etiladigan odamlar ro‘yxati berilgani ma’lum bo‘ldi. Ushbu fuqarolardan chegarani kesib o‘tish uchun harbiy komissariatdan berilgan ma’lumotnomalar talab qilinmoqda.
Rossiyada 3 ming nafargacha tibbiyot xodimlari safarbarlikka chaqirilishi mumkin
Rossiyadagi qisman safarbarlik doirasida 3 ming nafargacha tibbiyot xodimlari chaqirilishi mumkin. Bu haqda Davlat dumasining sog‘liqni saqlash bo‘yicha qo‘mitasi rahbari Dmitriy Xubezov “Interfaks”ga ma’lum qildi.
Xubezovning aniqlik kiritishicha, bu raqamlar sog‘liqni saqlash va mudofaa qo‘mitalarida muhokama qilingan.Rossiyada tibbiyot xodimlarining barchasi (erkaklarga ham, ayollarga ham) uchun harbiy xizmat majburiy hisoblanadi.
“Bu muammoni Qozog‘iston manfaatlaridan kelib chiqib hal qilamiz”. To‘qayev rossiyaliklar migratsiyasining kuchayishi sababli Moskva bilan muzokaralar olib borilishini aytdi
Qozog‘iston hukumati Rossiya fuqarolarining respublikaga ommaviy kelishi fonida Rossiya bilan muzokaralar olib boradi. Bu haqda Qozog‘iston prezidenti Qosim-Jo‘mart To‘qayev Turkiston viloyati jamoatchiligi bilan uchrashuvda aytib o‘tdi.
Qozog‘iston Ichki ishlar vazirligi ma’lumotlariga ko‘ra, 21-sentabrdan buyon respublikaga 98 mingga yaqin Rossiya fuqarosi kirib kelgan, shundan 64 ming nafari keyinchalik mamlakatni tark etgan.Yaponiyaning Rossiyadagi elchisi hibsga olindi
Rossiya Federal xavfsizlik xizmati Yaponiyaning Vladivostokdagi bosh konsulligi xodimi Motoka Tatsunori hibsga olingani haqida ma’lum qildi, deya xabar beradi Meduza. Xavfsizlik xizmati ma’lumotlariga ko‘ra, elchi “pul evaziga Rossiyaning Osiyo-Tinch okeani mintaqasi davlatlaridan biri bilan hamkorligining dolzarb jihatlari, G‘arb sanksiyalarining Primorsk o‘lkasidagi iqtisodiy vaziyatga ta’siri to‘g‘risidagi maxfiy ma’lumotni olayotganda hibsga olingan.Yaponiya vakili persona non grata deb e’lon qilindi.
Ushbu vaziyat yuzasidan, Yaponiya Tashqi ishlar vazirligi Rossiya elchisi Mixail Galuzinni chaqirib, konsulning hibsga olinishi munosabati bilan unga norozilik bildirdi. Vazirlik rahbari Yosimasa Xayasi diplomat noqonuniy xatti-harakatlar qilmaganini aytib, Moskvadan rasmiy uzr talab qildi. Yaponiya elchisi hozir ozodlikda, u 28-sentabrgacha Rossiyani tark etishi kerak.
Putin MDH davlatlari maxsus xizmatlari rahbarlari bilan uchrashuv o‘tkazadi
30-sentabr kuni Moskvada Mustaqil davlatlar hamdo‘stligi (MDH) mamlakatlari xavfsizlik organlari va razvedka xizmatlari rahbarlari majlisi bo‘lib o‘tadi. Bu haqda Rossiya Tashqi razvedka xizmati ma’lum qildi.
Tadbirda Rossiya vakillaridan tashqari, Ozarbayjon, Armaniston, Belarus, Qozog‘iston, Qirg‘iziston, Tojikiston va O‘zbekiston delegatsiyalari ishtirok etadi. Yig‘ilish razvedka faoliyati masalalari bo‘yicha bo‘lib o‘tadi. Uchrashuv doirasida Rossiya prezidenti Vladimir Putin MDH mamlakatlari razvedka xizmatlari rahbarlariga videoaloqa orqali murojaat qilishi kutilmoqda.
Izoh (0)