Toshkent shahri, Jizzax, Buxoro viloyatlarida yer maydonlari savdosi bilan bog‘liq firibgarlik holatlari fosh etildi. Bu haqda Iqtisodiy jinoyatlarga qarshi kurashish departamenti xabar qildi.
Qayd etilishicha, Bosh prokuratura huzuridagi departament hamda DXXning Jizzax viloyati boshqarmalari tomonidan tezkor tadbir o‘tkazilgan. Unda fuqaro T.X. fuqaro J.ga Sharof Rashidov tumani hududidagi yaqin qarindoshlariga tomorqa uchun ajratilgan 40 sotix yer maydonini hamda ushbu hududga tutash zaxiradagi 60 sotix yer maydonini rasmiylashtirib olib berish evaziga 110 million so‘mni olgan vaqtida ashyoviy dalillar bilan ushlangan.
Yashnobod tuman bo‘limi tomonidan o‘tkazilgan tezkor tadbirda “O‘zdaverloyiha” davlat ilmiy loyihalash instituti “Toshvilerloyiha” bo‘linmasi muhandisi Sh.Sh. fuqaro I.U. bilan oldindan o‘zaro til biriktirib, fuqaro U.ga Zangiota tumanida 8 sotix yer maydonini 22 000 dollarga sotishga kelishgani aniqlangan. Ular tanishlari orqali hujjatlarini rasmiylashtirib berishi evaziga oldindan 2 000 dollar olgan vaqtida ashyoviy dalillar bilan ushlangan.
Shuningdek, Olot tuman bo‘limi tomonidan IIB xodimlari bilan hamkorlikda tezkor tadbir o‘tkazilgan. Unda fuqaro O‘.H. fuqaro N.ga yuqori lavozimda ishlovchi tanishlari yordamida Kogon tumani hududidan zaxiradagi 8 sotix yer maydonini rasmiylashtirib olib berish evaziga 9 500 dollarni olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)