«Дарё» нашри 27 сентябрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Россия Мудофаа вазирлиги сафарбарлик доирасида фуқароларнинг ҳаракатланиши чекланмаслигини маълум қилди. Бироқ чегарачилар россияликларга чиқишни тақиқлашни бошлаган
Россия ҳукумати томонидан эълон қилинган сафарбарлик мамлакат фуқароларининг ҳаракатланиши чекланишини назарда тутмайди. Бу ҳақда мамлакат Мудофаа вазирлиги маълум қилди.
«Россия Мудофаа вазирлиги ойдинлик киритади: Россия Федерациясида қисман сафарбарлик ўтказилиши шароитларида фуқароларнинг ҳаракатланишига нисбатан чекловлар назарда тутилмайди», — дейилади идоранинг расмий Telegram-каналида. Мудофаа вазирлиги баёнотида гап Россия ичкарисида ҳаракатланиш ҳақида ёки чет элга сафарлар ҳақида бораётгани ноаниқ. Идора бу борада батафсил изоҳлар бермаган.
25 сентябрдан чақириқ ёшидаги эркаклар чегарадан чиқарилмаётгани ҳақида алоҳида хабарлар пайдо бўла бошлади. Чегарачилар ўз хатти-ҳаракатларини сафарбарлик тўғрисидаги қонун билан изоҳламоқда. Ҳуқуқшунослар бундай ҳаракатларни қонунга зид деб баҳоламоқда.26 сентябрь куни аэропортлардаги чегарачиларга сафарбарликка жалб этиладиган одамлар рўйхати берилгани маълум бўлди. Ушбу фуқаролардан чегарани кесиб ўтиш учун ҳарбий комиссариатдан берилган маълумотномалар талаб қилинмоқда.
Россияда 3 минг нафаргача тиббиёт ходимлари сафарбарликка чақирилиши мумкин
Россиядаги қисман сафарбарлик доирасида 3 минг нафаргача тиббиёт ходимлари чақирилиши мумкин. Бу ҳақда Давлат думасининг соғлиқни сақлаш бўйича қўмитаси раҳбари Дмитрий Хубезов «Интерфакс»га маълум қилди.
Хубезовнинг аниқлик киритишича, бу рақамлар соғлиқни сақлаш ва мудофаа қўмиталарида муҳокама қилинган.Россияда тиббиёт ходимларининг барчаси (эркакларга ҳам, аёлларга ҳам) учун ҳарбий хизмат мажбурий ҳисобланади.
«Бу муаммони Қозоғистон манфаатларидан келиб чиқиб ҳал қиламиз». Тўқаев россияликлар миграциясининг кучайиши сабабли Москва билан музокаралар олиб борилишини айтди
Қозоғистон ҳукумати Россия фуқароларининг республикага оммавий келиши фонида Россия билан музокаралар олиб боради. Бу ҳақда Қозоғистон президенти Қосим-Жўмарт Тўқаев Туркистон вилояти жамоатчилиги билан учрашувда айтиб ўтди.
Қозоғистон Ички ишлар вазирлиги маълумотларига кўра, 21 сентябрдан буён республикага 98 мингга яқин Россия фуқароси кириб келган, шундан 64 минг нафари кейинчалик мамлакатни тарк этган.Япониянинг Россиядаги элчиси ҳибсга олинди
Россия Федерал хавфсизлик хизмати Япониянинг Владивостокдаги бош консуллиги ходими Мотока Тацунори ҳибсга олингани ҳақида маълум қилди, дея хабар беради Meduza. Хавфсизлик хизмати маълумотларига кўра, элчи «пул эвазига Россиянинг Осиё-Тинч океани минтақаси давлатларидан бири билан ҳамкорлигининг долзарб жиҳатлари, Ғарб санкцияларининг Приморск ўлкасидаги иқтисодий вазиятга таъсири тўғрисидаги махфий маълумотни олаётганда ҳибсга олинган.Япония вакили persona non grata деб эълон қилинди.
Ушбу вазият юзасидан, Япония Ташқи ишлар вазирлиги Россия элчиси Михаил Галузинни чақириб, консулнинг ҳибсга олиниши муносабати билан унга норозилик билдирди. Вазирлик раҳбари Ёсимаса Хаяси дипломат ноқонуний хатти-ҳаракатлар қилмаганини айтиб, Москвадан расмий узр талаб қилди. Япония элчиси ҳозир озодликда, у 28 сентябргача Россияни тарк этиши керак.
Путин МДҲ давлатлари махсус хизматлари раҳбарлари билан учрашув ўтказади
30 сентябрь куни Москвада Мустақил давлатлар ҳамдўстлиги (МДҲ) мамлакатлари хавфсизлик органлари ва разведка хизматлари раҳбарлари мажлиси бўлиб ўтади. Бу ҳақда Россия Ташқи разведка хизмати маълум қилди.
Тадбирда Россия вакилларидан ташқари, Озарбайжон, Арманистон, Беларусь, Қозоғистон, Қирғизистон, Тожикистон ва Ўзбекистон делегациялари иштирок этади. Йиғилиш разведка фаолияти масалалари бўйича бўлиб ўтади. Учрашув доирасида Россия президенти Владимир Путин МДҲ мамлакатлари разведка хизматлари раҳбарларига видеоалоқа орқали мурожаат қилиши кутилмоқда.
Изоҳ (0)