AOKAda o‘tkazilgan brifingda Fanlar akademiyasi axborot xizmati rahbari Mohira Jumanova o‘tgan yarim yillikda olib borilgan arxeologik tadqiqotlar haqida ma’lumot berdi.
Qayd etilishicha, Fanlar akademiyasi Milliy arxeologiya markazi tomonidan joriy yilning 1-yarim yilligida jami 10 dan ortiq arxeologik obyektda izlanishlar olib borilgan. Jumladan, Surxondaryo viloyati Sherobod tumani Xatak qishlog‘i yaqinida olib borilgan izlanishlar natijasida qadimgi tosh davriga oid g‘or-makon aniqlangan. G‘or-makon 100—60 ming yil oldin, ya’ni, neandertal odami yashagan davrga tegishli hisoblanadi. Topilmalar orasida tosh qurollar, yovvoyi hayvonlarning maydalangan suyaklari va o‘choq qoldiqlari mavjud.
Shuningdek, G‘oz qishlog‘i atrofida Oqtosh tog‘i hududida cho‘kichlab ishlangan bir o‘rkachli tuyaning qoyatosh tasviri topilgan. Shu hududdan mezolit davriga oid yodgorlik, ichida esa ko‘plab toshdan yasalgan buyumlar aniqlangan.
O‘zbekiston—AQSH qo‘shma ekspeditsiyasi tomonidan Buxoro Shahristonida olib borilgan qazishma ishlari natijasida ilk o‘rta asrlarga oid yana bir shahar aniqlangan.
Mazkur ekspeditsiya tomonidan Jizzax viloyati Zomin tumani To‘g‘onbuloq yodgorligida ilk arxeologik tadqiqotlar olib borilgan va Qoraxoniylar davriga oid 20 gektar maydonga ega ko‘chmanchilar shaharchasi aniqlangan.
Fransiya—O‘zbekiston qo‘shma ekspeditsiyasi tomonidan Janubiy Nurota tog‘ tizmasi G‘o‘bdintog‘ va Qaroqchitog‘ (Qorachatog‘) hududlarida yigirmadan ortiq arxeologik topilma joylar tizimli ravishda o‘rganilgan. Ular orasida bronza davridan o‘rta asrlar davriga doir 145 dan ziyod noyob qoyatosh rasmlari namunalari topilgan.
Axsikent arxeologik ekspeditsiyasi tomonidan Axsikent arxeologik obyektida qazuv ishlari davomida Qoraxoniylar davriga oid turar joy qoldiqlari va ko‘plab sopol buyumlar, tangalar va temir buyumlari aniqlangan.
Andijon viloyati Qo‘rg‘ontepa tumani Xonabod shahri tog‘ yon bag‘rilaridagi Xonabod 1-2 yodgorliklaridagi qabr qo‘rg‘onlarida qazuv ishlari olib borilgan. Natijada miloddan avvalgi VI—IV asrlarga oid moddiy madaniyat buyumlari, jumladan, qabr-qo‘rg‘onlar, taqinchoqlar, sopol buyumlar, temir buyumlar aniqlangan.
Farg‘ona viloyati Qo‘qon shahri markazidagi Tepaqo‘rg‘on arxeologik yodgorligida tadqiqot ishlari olib borilgan. Qadimiy shaharning janubi-sharqiy qismida yarim aylana ko‘rinishidagi burj va 2 qatorli mudofaa devori mavjudligi, shuningdek, shimoliy tomonda 7 metr balandlikda saqlangan mudofaa devori aniqlangan.
Hozirda Qoraqalpog‘iston Respublikasi Beruniy tumanidagi Oqshaxon qal’a yodgorligida qazuv ishlari olib borilib, qal’aga kirish darvoza oldi labirint qismi o‘rganilmoqda.
Toshkent viloyati Ohangaron tumani Suyurlitepa yodgorligi va uning atrof hududlarida statsionar qazishma ishlari olib borilib, mudofaa inshooti aniqlangan. Shuningdek, Suyurlitepa shahar qismidagi ichki yo‘llar tizimi, shaharning rabod qismida Qovunchi II madaniyatiga oid 3 ta mozor-qo‘rg‘on ma’lum bo‘lgan. Suyurlitepaning janubiy qismida ilk o‘rta asrlarga oid qishloq jamoasi manzilgohi ochib o‘rganilgan.
O‘zbek—Rossiya qo‘shma ekspeditsiyasi tomonidan Farg‘ona, Namangan va Andijon viloyatlari hududida, Markaziy Farg‘ona cho‘llarida qadimgi tosh davri – neolit jamoalari tomonidan qoldirilgan topilma joylar o‘rganilgan. Ulug‘nor, Sho‘rko‘l kabi qadimgi ko‘llar hududida neolit davri mikrolit qurollari aniqlangan hamda hudud polinalogiyasini aniqlash maqsadida namunalar olingan.
Hozirda mutaxassislar tomonidan arxeologik tadqiqotlar davom ettirilmoqda.
Izoh (0)