АОКАда ўтказилган брифингда Фанлар академияси ахборот хизмати раҳбари Моҳира Жуманова ўтган ярим йилликда олиб борилган археологик тадқиқотлар ҳақида маълумот берди.
Қайд этилишича, Фанлар академияси Миллий археология маркази томонидан жорий йилнинг 1-ярим йиллигида жами 10 дан ортиқ археологик объектда изланишлар олиб борилган. Жумладан, Сурхондарё вилояти Шеробод тумани Хатак қишлоғи яқинида олиб борилган изланишлар натижасида қадимги тош даврига оид ғор-макон аниқланган. Ғор-макон 100—60 минг йил олдин, яъни, неандертал одами яшаган даврга тегишли ҳисобланади. Топилмалар орасида тош қуроллар, ёввойи ҳайвонларнинг майдаланган суяклари ва ўчоқ қолдиқлари мавжуд.
Шунингдек, Ғоз қишлоғи атрофида Оқтош тоғи ҳудудида чўкичлаб ишланган бир ўркачли туянинг қоятош тасвири топилган. Шу ҳудуддан мезолит даврига оид ёдгорлик, ичида эса кўплаб тошдан ясалган буюмлар аниқланган.
Ўзбекистон—АҚШ қўшма экспедицияси томонидан Бухоро Шаҳристонида олиб борилган қазишма ишлари натижасида илк ўрта асрларга оид яна бир шаҳар аниқланган.
Мазкур экспедиция томонидан Жиззах вилояти Зомин тумани Тўғонбулоқ ёдгорлигида илк археологик тадқиқотлар олиб борилган ва Қорахонийлар даврига оид 20 гектар майдонга эга кўчманчилар шаҳарчаси аниқланган.
Франция—Ўзбекистон қўшма экспедицияси томонидан Жанубий Нурота тоғ тизмаси Ғўбдинтоғ ва Қароқчитоғ (Қорачатоғ) ҳудудларида йигирмадан ортиқ археологик топилма жойлар тизимли равишда ўрганилган. Улар орасида бронза давридан ўрта асрлар даврига доир 145 дан зиёд ноёб қоятош расмлари намуналари топилган.
Ахсикент археологик экспедицияси томонидан Ахсикент археологик объектида қазув ишлари давомида Қорахонийлар даврига оид турар жой қолдиқлари ва кўплаб сопол буюмлар, тангалар ва темир буюмлари аниқланган.
Андижон вилояти Қўрғонтепа тумани Хонабод шаҳри тоғ ён бағриларидаги Хонабод 1-2 ёдгорликларидаги қабр қўрғонларида қазув ишлари олиб борилган. Натижада милоддан аввалги VI—IV асрларга оид моддий маданият буюмлари, жумладан, қабр-қўрғонлар, тақинчоқлар, сопол буюмлар, темир буюмлар аниқланган.
Фарғона вилояти Қўқон шаҳри марказидаги Тепақўрғон археологик ёдгорлигида тадқиқот ишлари олиб борилган. Қадимий шаҳарнинг жануби-шарқий қисмида ярим айлана кўринишидаги бурж ва 2 қаторли мудофаа девори мавжудлиги, шунингдек, шимолий томонда 7 метр баландликда сақланган мудофаа девори аниқланган.
Ҳозирда Қорақалпоғистон Республикаси Беруний туманидаги Оқшахон қалъа ёдгорлигида қазув ишлари олиб борилиб, қалъага кириш дарвоза олди лабиринт қисми ўрганилмоқда.
Тошкент вилояти Оҳангарон тумани Суюрлитепа ёдгорлиги ва унинг атроф ҳудудларида стационар қазишма ишлари олиб борилиб, мудофаа иншооти аниқланган. Шунингдек, Суюрлитепа шаҳар қисмидаги ички йўллар тизими, шаҳарнинг рабод қисмида Қовунчи II маданиятига оид 3 та мозор-қўрғон маълум бўлган. Суюрлитепанинг жанубий қисмида илк ўрта асрларга оид қишлоқ жамоаси манзилгоҳи очиб ўрганилган.
Ўзбек—Россия қўшма экспедицияси томонидан Фарғона, Наманган ва Андижон вилоятлари ҳудудида, Марказий Фарғона чўлларида қадимги тош даври – неолит жамоалари томонидан қолдирилган топилма жойлар ўрганилган. Улуғнор, Шўркўл каби қадимги кўллар ҳудудида неолит даври микролит қуроллари аниқланган ҳамда ҳудуд полиналогиясини аниқлаш мақсадида намуналар олинган.
Ҳозирда мутахассислар томонидан археологик тадқиқотлар давом эттирилмоқда.
Изоҳ (0)