Buxoro viloyatining bir nechta tumanlarida yer ostidan noqonuniy qazilmalar qazish olish bilan shug‘ullanuvchi, biroq soliqdan yashirinib kelgan korxonalar borligi aniqlandi. Bu haqda “Daryo”ga viloyat davlat soliq boshqarmasi boshlig‘i Maqsud Mamatxonov ma’lum qildi.
Ta’kidlanishicha, viloyatda yer ostidan foydalanganlik uchun soliq to‘lovchi subyektlar soni jami 225 tadan iborat.
Viloyat davlat soliq boshqarmasi xodimlari tomonidan yer ostidan foydali qazilmalar jumladan, shag‘al, ohak, tosh qazib oluvchi korxonalarning amaldagi qonunchilik talablariga rioya qilishi hamda davlat budjetiga soliqlarni o‘z vaqtida to‘liq to‘lashi ustidan nazorat tadbirlari amalga oshirilgan.
Tuzilgan ishchi guruhi tomonidan 12 ta kon va karyerda marksheyderlik o‘lchov ishlari (qazib olingan yer osti metr kubini o‘lchash) o‘tkazilgan.
“O‘tkazilgan marksheyderlik o‘lchov ishlari natijasida 9 ta holatda yer ostidan foydalanganlik uchun soliq hisobotida qazib olish hajmi 282 ming 921 metr/kubga kamaytirib ko‘rsatilgani, shundan 7 ta holatda 194 ming 973 metr/kub foydali qazilma noqonuniy ravishda qazib olingani aniqlandi. Buning ortidan jami 2,1 milliard so‘m yer ostidan foydalanganlik uchun soliq hisoblanmasdan qolgan”, — deydi Maqsud Mamatxonov.
Viloyat davlat soliq boshqarmasi boshlig‘ining bildirishicha, G‘ijduvon tumanida faoliyat ko‘rsatayotgan “Sardor Otabek Abulfayz” MCHJ tomonidan 50234,5 metr/kub qazilma hajmi soliq hisobotlarida kamaytirib ko‘rsatilgan. Ushbu jamiyat o‘ziga tegishli bo‘lmagan karyerdan 11 296 metr/kub foydali qazilmani noqonuniy qazib olgan va uning oqibatida 0,4 milliard so‘m kam soliq hisoblangan. Xuddi shuningdek, yana mazkur tumandagi “Botir Bobur omadi” MCHJ tomonidan 38 339 metr/kub qazilma hajmi soliq hisobotlarida ko‘rsatilmagani aniqlangan va 0,3 milliard so‘m soliq hisoblanmasdan qolgan.
Shofirkon tumanida faoliyat ko‘rsatayotgan “Ozod Jilvon 2018” fermer xo‘jaligi hamda Pomegranate Building mas’uliyati cheklangan jamiyat tomonidan jami 198 113 metr/kub qazilma hajmi soliq hisobotlaridan yashirib kelingan.
“Bulardan tashqari, yer osti qazilmalaridan foydalanuvchi xo‘jalik yurituvchi subyektlar tomonidan rasmiylashtirilgan elektron hisob-varaq fakturalar orqali realizatsiya qilingan foydali qazilmalar hajmini yer ostidan foydalanganlik uchun soliq hisobotida aks ettirilishi tahlil qilindi. Unda 11 ta holatda 630 258 metr/kub (3,9 milliard so‘m) farq aniqlandi va shundan hozirgi kunda 170 596 metr/kub (0,7 millard so‘m) tafovut bartaraf etildi. Aniqlangan noqonuniy qazish holatlari huquqiy baho berish uchun huquqni muhofaza qiluvchi organlariga yuborildi”, — dedi Maqsud Mamatxonov.
Izoh (0)