Andijondagi janjalda 36 yoshli erkak vafot etdi. Marhumning yaqinlari uni do‘kon sotuvchisi urib o‘ldirganini aytmoqda

Andijon viloyatining Oltinko‘l tumanida 2022-yilning 1-sentabr kuni kech 19:00 larda yuz bergan janjal oqibatida Abror Jo‘rayev ismli 36 yoshli fuqaro voqea joyida vafot etgan. Uning vafotida amakivachchalar o‘rtasidagi tortishuvga qo‘shilgan do‘kon sotuvchisining qo‘li borligi aytilmoqda. Bu haqda “Daryo”ga marhumning yaqinlari ma’lum qildi.

Marhum yaqinlarining aytishicha, janjal voqeasi hududdagi kuzatuv kamerasiga tushgan. Biroq tergovchi bu videoyozuvlarni ularga bermayapti.

Voqea ishtirokchisi Dilshodbek Nizomovning aytishicha, janjalga Abrorning amakivachchasi Shuhrat bilan yuz bergan tortishuv sabab bo‘lgan.

Do‘konga kirib, tabor pivo so‘radik. Do‘konchi unaqa pivo yo‘q, boshqasi bor dedi. Keyin olmaymiz deb chiqib ketayotganimizda Abror borini olaveraylik dedi. Qo‘ying, kerakmas deb chiqib ketayotganimizda Abrorning amakasini o‘g‘li Shuhrat kelib qoldi. U bilan ko‘rishib, uch metrcha nariroqqa yurdim. Orqamdan Abror chiqdi. Yonimga kelayotganida amakivachchasiga qarab “Shuhrat aka pochcham kelibdi, yuring mehmon qilaman”, dedi. Shuhrat unga javoban “Sen-a? Mehmon qilolasanmi sen?”, dedi. “Ha, aka men mehmon qilaman”, degandi “Sen mehmon qilolmaysan”, dedi. Shunda Abror “aka, siz meni noto‘g‘ri tushunyapsiz. Qachon mehmon qilolmay qolganman?”, deganda “Meni mehmon qilish sengamas”, dedi.

Shundan keyin ikkalasi bir-biriga qarab yurdi. Men Abrorni qaytardim, u qaytdi. Biroq amakisining o‘g‘li bitta gapni qaytaraverdi. Shundan keyin ikkalasi urushib ketdi. O‘rtalariga tushib “Qo‘ying, Abror”, deb ajratayotganimda do‘konchi chiqdi. Unga Abrorni olib ketishni so‘radim. O‘zim esa Shuhratga qarab, “Qo‘ysangizchi, axir aka-ukaning bolalari bo‘lsangiz. Bir-biringlar bilan shunaqa janjal qilsangizlar yaxshimi? Ko‘rgan ko‘zga yaxshimas-ku? Unda ko‘ra, tinch ketinglar”, dedim. Ketishmadi. Aksincha, turgan joyida gaplarini qaytaraverdi. Abror esa unga javoban “Men har qanaqasiga mehmon qila olaman. Qachon mehmon qilolmaganman”, deyaverdi. Shuhrat esa so‘kindi. Shundan keyin tortishuv avj oldi. Do‘konchi esa “bu yerda so‘kinmanglar”, deb Shuhratni ushlab qoldi. Ikkalasini ajratishga harakat qildim. Ammo ajratayotgan vaqtimda do‘konchi meni mushtlab urdi. Kutilmagan zarbadan dovdirab, ko‘z oldim qorong‘ilashib ketdi. Ko‘zimni ochganimda do‘konchini ushlab qolishga intildim. Lekin u qo‘limdan siltab chiqdi-da, engashib qolganimdan foydalanib burun, og‘iz aralash futbolka bilan meni dimlab, bo‘g‘ib ko‘kragimga tizza qo‘ydi. Bir amallab, jon holatda o‘zimni himoya qildim-da, o‘ng tarafimga qaraganimda Abror yerda yotgan ekan. Yugurib oldiga borib, turgizishga harakat qildim. Lekin turmadi. Kimdir tili tanglayiga yopishib qolgandir, qo‘lingizni tiqib ko‘ring degandi. Og‘ziga qo‘limni tiqib, tilini pasga bosdim. Keyin atrofdagilardan suv so‘rasam hech kim yordam bermadi. Shunda do‘konga yugurib kirib suv olib chiqdim-da, yuziga sochdim. Kimdir qoshiq solish kerak deb qoshiq olib keldi uni ham soldik. Yuragini massaj qilish kerak deyishgandi, massaj ham qilindi. Yeganlari og‘zidan chiqib ketdi. Keyin shifokorlar kelib, qochinglar deyishdi, chekkaga o‘tdik. Olib ketishdi. Orqasidan borganimizda shifokorlar o‘lganini aytishdi. Men shokka tushib qoldim. Uch kun deganda zo‘rg‘a o‘zimga keldim. Bo‘lgan voqea shu”, — deydi marhumning pochchasi Dilshodbek Nizomov.

Dilshodbek Nizomovning qo‘shimcha qilishicha,  voqea guvohlari unga do‘konchi hech qanday sababsiz ikkisini ajratayotgan vaqtida birinchi unga keyin esa Abrorga musht tushirganini aytgan.

Kamera yozuvlarini ko‘rganlar “Sen Shuhratni to‘sib qolgansan. Do‘konchi Abrorni bitta urganda yerga yiqilib, oyog‘ini qimirlatib o‘lgan”, deyishyapti”, — deydi Dilshodbek Nizomov.

Tergovchidan sud ekspertizasi xulosasini berishini so‘raganimizda bermadi. Hech bo‘lmasa nusxasini beringlar desak, “Hattoki nusxasini ham ko‘rish umuman mumkin emas. Faqat oilasi ko‘radi”, degan javob berishdi. Achinarlisi, oilasiga ham ko‘rsatishmadi. Shundan so‘ng ekspertiza qilingan joyga borib nusxasini olib keldik. Keyin to‘polon qilib bo‘lsa-da tergovga yana kirdik. Shunda olingan xulosa nusxasini tergovchiga ko‘rsatganimda qog‘ozdagini o‘qib qarab-qarab qo‘ydi. Do‘konga qo‘yilgan kamera tasvirlarini bir nusxasini so‘radik, mumkinmas deyilyapti. So‘rab surishtirganimizda bizning, ya’ni oila a’zolarining uni olishga haqimiz bor ekan. Lekin tergovchilar bizga “Agar sizlarga buni beradigan bo‘lsak, eski yaralarni yangilab qo‘yamiz-da”, deyishyapti. Biz nima bo‘lsa bo‘lar, deb berishini talab qilyapmiz. Afsuski, hech narsani berishmayapti. Chunki, opalari va akalari bilan birga tergovchi ishtirokida tasvirlarni ko‘rib chiqdik. Shunda ham prokuratura xodimlari o‘rtaga tushganidan keyin bitta telefon orqali ko‘rsatishdi. Ungacha rosa yalintirishdi. Biz bir narsani tushunmayapmiz nimaga hujjatlarni bizga bermayapti, nega xulosalarni yashirishyapti? Marhumning ayoli prezidentga murojaat qilaman deyishgach, xulosani beramiz deyishgan. Shuni kutyapmiz”, — deydi Shuhrat Yusupov.

Tutqanog‘i tutib qolgan deyishyapti. Lekin shu kungacha unda bunday holatlar kuzatilmagan, hech qanday shifoxonada ro‘yxatda ham turmas edi. Tasvirlarni ko‘rganimizda umuman boshqacha holat. Abror kaltak yegandan so‘ng orqa miya bilan yerga tushyapti. Shuning natijasida vafot etganligi ko‘rinib turibdi. Nimaga endi aynan bunday xulosaga kelishmoqda buni tushunmayapmiz. Haqiqatni yashirishga urinishmoqda”, — deydi Shuhrat Yusupov.

“Daryo” voqealar rivojini kuzatishda davom etadi.