Андижон вилоятининг Олтинкўл туманида 2022 йилнинг 1 сентябрь куни кеч 19:00 ларда юз берган жанжал оқибатида Аброр Жўраев исмли 36 ёшли фуқаро воқеа жойида вафот этган. Унинг вафотида амакиваччалар ўртасидаги тортишувга қўшилган дўкон сотувчисининг қўли борлиги айтилмоқда. Бу ҳақда «Дарё»га марҳумнинг яқинлари маълум қилди.
Марҳум яқинларининг айтишича, жанжал воқеаси ҳудуддаги кузатув камерасига тушган. Бироқ терговчи бу видеоёзувларни уларга бермаяпти.
Воқеа иштирокчиси Дилшодбек Низомовнинг айтишича, жанжалга Аброрнинг амакиваччаси Шуҳрат билан юз берган тортишув сабаб бўлган.
Дўконга кириб, табор пиво сўрадик. Дўкончи унақа пиво йўқ, бошқаси бор деди. Кейин олмаймиз деб чиқиб кетаётганимизда Аброр борини олаверайлик деди. Қўйинг, керакмас деб чиқиб кетаётганимизда Аброрнинг амакасини ўғли Шуҳрат келиб қолди. У билан кўришиб, уч метрча нарироққа юрдим. Орқамдан Аброр чиқди. Ёнимга келаётганида амакиваччасига қараб «Шуҳрат ака поччам келибди, юринг меҳмон қиламан», деди. Шуҳрат унга жавобан «Сен-а? Меҳмон қилоласанми сен?», деди. «Ҳа, ака мен меҳмон қиламан», деганди «Сен меҳмон қилолмайсан», деди. Шунда Аброр «ака, сиз мени нотўғри тушуняпсиз. Қачон меҳмон қилолмай қолганман?», деганда «Мени меҳмон қилиш сенгамас», деди.Шундан кейин иккаласи бир-бирига қараб юрди. Мен Аброрни қайтардим, у қайтди. Бироқ амакисининг ўғли битта гапни қайтараверди. Шундан кейин иккаласи урушиб кетди. Ўрталарига тушиб «Қўйинг, Аброр», деб ажратаётганимда дўкончи чиқди. Унга Аброрни олиб кетишни сўрадим. Ўзим эса Шуҳратга қараб, «Қўйсангизчи, ахир ака-уканинг болалари бўлсангиз. Бир-биринглар билан шунақа жанжал қилсангизлар яхшими? Кўрган кўзга яхшимас-ку? Унда кўра, тинч кетинглар», дедим. Кетишмади. Аксинча, турган жойида гапларини қайтараверди. Аброр эса унга жавобан «Мен ҳар қанақасига меҳмон қила оламан. Қачон меҳмон қилолмаганман», деяверди. Шуҳрат эса сўкинди. Шундан кейин тортишув авж олди. Дўкончи эса «бу ерда сўкинманглар», деб Шуҳратни ушлаб қолди. Иккаласини ажратишга ҳаракат қилдим. Аммо ажратаётган вақтимда дўкончи мени муштлаб урди. Кутилмаган зарбадан довдираб, кўз олдим қоронғилашиб кетди. Кўзимни очганимда дўкончини ушлаб қолишга интилдим. Лекин у қўлимдан силтаб чиқди-да, энгашиб қолганимдан фойдаланиб бурун, оғиз аралаш футболка билан мени димлаб, бўғиб кўкрагимга тизза қўйди. Бир амаллаб, жон ҳолатда ўзимни ҳимоя қилдим-да, ўнг тарафимга қараганимда Аброр ерда ётган экан. Югуриб олдига бориб, тургизишга ҳаракат қилдим. Лекин турмади. Кимдир тили танглайига ёпишиб қолгандир, қўлингизни тиқиб кўринг деганди. Оғзига қўлимни тиқиб, тилини пасга босдим. Кейин атрофдагилардан сув сўрасам ҳеч ким ёрдам бермади. Шунда дўконга югуриб кириб сув олиб чиқдим-да, юзига сочдим. Кимдир қошиқ солиш керак деб қошиқ олиб келди уни ҳам солдик. Юрагини массаж қилиш керак дейишганди, массаж ҳам қилинди. Еганлари оғзидан чиқиб кетди. Кейин шифокорлар келиб, қочинглар дейишди, чеккага ўтдик. Олиб кетишди. Орқасидан борганимизда шифокорлар ўлганини айтишди. Мен шокка тушиб қолдим. Уч кун деганда зўрға ўзимга келдим. Бўлган воқеа шу», — дейди марҳумнинг поччаси Дилшодбек Низомов.
Дилшодбек Низомовнинг қўшимча қилишича, воқеа гувоҳлари унга дўкончи ҳеч қандай сабабсиз иккисини ажратаётган вақтида биринчи унга кейин эса Аброрга мушт туширганини айтган.
Камера ёзувларини кўрганлар «Сен Шуҳратни тўсиб қолгансан. Дўкончи Аброрни битта урганда ерга йиқилиб, оёғини қимирлатиб ўлган», дейишяпти», — дейди Дилшодбек Низомов.Марҳумнинг яна бир поччаси Шуҳрат Юсуповнинг айтишича, Аброрнинг оила аъзолари терговчидан суд экспертиза хулосасини сўраган, аммо ололмаган.
Терговчидан суд экспертизаси хулосасини беришини сўраганимизда бермади. Ҳеч бўлмаса нусхасини беринглар десак, «Ҳаттоки нусхасини ҳам кўриш умуман мумкин эмас. Фақат оиласи кўради», деган жавоб беришди. Ачинарлиси, оиласига ҳам кўрсатишмади. Шундан сўнг экспертиза қилинган жойга бориб нусхасини олиб келдик. Кейин тўполон қилиб бўлса-да терговга яна кирдик. Шунда олинган хулоса нусхасини терговчига кўрсатганимда қоғоздагини ўқиб қараб-қараб қўйди. Дўконга қўйилган камера тасвирларини бир нусхасини сўрадик, мумкинмас дейиляпти. Сўраб суриштирганимизда бизнинг, яъни оила аъзоларининг уни олишга ҳақимиз бор экан. Лекин терговчилар бизга «Агар сизларга буни берадиган бўлсак, эски яраларни янгилаб қўямиз-да», дейишяпти. Биз нима бўлса бўлар, деб беришини талаб қиляпмиз. Афсуски, ҳеч нарсани беришмаяпти. Чунки, опалари ва акалари билан бирга терговчи иштирокида тасвирларни кўриб чиқдик. Шунда ҳам прокуратура ходимлари ўртага тушганидан кейин битта телефон орқали кўрсатишди. Унгача роса ялинтиришди. Биз бир нарсани тушунмаяпмиз нимага ҳужжатларни бизга бермаяпти, нега хулосаларни яширишяпти? Марҳумнинг аёли президентга мурожаат қиламан дейишгач, хулосани берамиз дейишган. Шуни кутяпмиз», — дейди Шуҳрат Юсупов.Шуҳрат Юсуповнинг таъкидлашича, шифокорлар марҳумнинг вафотига касаллик сабаб бўлган деган фикрни билдирган. Бироқ унда ҳеч қандай касаллик аломатлари бўлмаган.
Тутқаноғи тутиб қолган дейишяпти. Лекин шу кунгача унда бундай ҳолатлар кузатилмаган, ҳеч қандай шифохонада рўйхатда ҳам турмас эди. Тасвирларни кўрганимизда умуман бошқача ҳолат. Аброр калтак егандан сўнг орқа мия билан ерга тушяпти. Шунинг натижасида вафот этганлиги кўриниб турибди. Нимага энди айнан бундай хулосага келишмоқда буни тушунмаяпмиз. Ҳақиқатни яширишга уринишмоқда», — дейди Шуҳрат Юсупов.Мазкур ҳолат бўйича жиноят иши очилган ёки очилмагани номаълум. «Дарё»нинг бу ҳақдаги сўровига на вилоят прокуратураси ва на Бош прокуратура жавоб берди.
«Дарё» воқеалар ривожини кузатишда давом этади.
Изоҳ (0)