Yaponiya hududiga urilgan kuchli “Nanmadol” tayfuni oqibatida 150 dan ortiq odam jarohatlandi, ikki kishi halok bo‘ldi. Bu haqda mahalliy OAVga tayanib, “Interfaks” xabar berdi.
Miyazaki prefekturasida uyini ko‘chki bosgan erkak halok bo‘ldi. Yana bir marhumning jasadi suv bosgan mashina ichidan topildi.
Xirosima prefekturasida bir kishi bedarak yo‘qolganlar ro‘yxatida. Prefekturalar hukumatlari ma’lumotlariga ko‘ra, tayfundan kamida 151 kishi jabrlangan.
350 000 dan ortiq uy elektr ta’minotisiz qolmoqda, deb xabar qildi Kyusyu Electric Power Co. kompaniyasi.
Japan Airlines Yaponiya 20-sentabr kuni 43 ta reysni, All Nippon Airways esa 30 ta reysni bekor qildi. Boshqa aviakompaniyalar ham ayrim reyslarni, asosan Kyusyu va Kansay mintaqalariga xizmat ko‘rsatuvchi yo‘nalishlarda bekor qildi.
20-sentabr kuni tayfunning kuchsizlanishi kutilmoqda. Shu bilan birga, 21-sentabr kuni ertalab Yaponiyaning markaziy va sharqiy qismida, jumladan Tokioda 120 millimetrgacha, shimoli-sharqda esa 100 millimetrgacha yog‘ingarchilik kutilmoqda.
Meteorologlar aholini ko‘chkilar, daryo toshqinidan, pasttekis hududlarda suv toshqini, kuchli shamol va baland to‘lqinlardan ehtiyot bo‘lishga chaqirmoqda.
“Nanmadol” tayfuni Yaponiyaning janubi-g‘arbiy qismiga 18-sentabr kuni yetib kelgan edi. Dovul shamollari va bo‘ronli to‘lqinlar tufayli bir necha million odam evakuatsiya qilindi, poyezdlar va paromlar qatnovi to‘xtatildi, mahalliy aeroportlar yopildi.
Izoh (0)