Япония ҳудудига урилган кучли «Нанмадол» тайфуни оқибатида 150 дан ортиқ одам жароҳатланди, икки киши ҳалок бўлди. Бу ҳақда маҳаллий ОАВга таяниб, «Интерфакс» хабар берди.
Миязаки префектурасида уйини кўчки босган эркак ҳалок бўлди. Яна бир марҳумнинг жасади сув босган машина ичидан топилди.
Хиросима префектурасида бир киши бедарак йўқолганлар рўйхатида. Префектуралар ҳукуматлари маълумотларига кўра, тайфундан камида 151 киши жабрланган.
350 000 дан ортиқ уй электр таъминотисиз қолмоқда, деб хабар қилди Kyusyu Electric Power Co. компанияси.
Japan Airlines Япония 20 сентябрь куни 43 та рейсни, All Nippon Airways эса 30 та рейсни бекор қилди. Бошқа авиакомпаниялар ҳам айрим рейсларни, асосан Кюсю ва Кансай минтақаларига хизмат кўрсатувчи йўналишларда бекор қилди.
20 сентябрь куни тайфуннинг кучсизланиши кутилмоқда. Шу билан бирга, 21 сентябрь куни эрталаб Япониянинг марказий ва шарқий қисмида, жумладан Токиода 120 миллиметргача, шимоли-шарқда эса 100 миллиметргача ёғингарчилик кутилмоқда.
Метеорологлар аҳолини кўчкилар, дарё тошқинидан, пасттекис ҳудудларда сув тошқини, кучли шамол ва баланд тўлқинлардан эҳтиёт бўлишга чақирмоқда.
«Нанмадол» тайфуни Япониянинг жануби-ғарбий қисмига 18 сентябрь куни етиб келган эди. Довул шамоллари ва бўронли тўлқинлар туфайли бир неча миллион одам эвакуация қилинди, поездлар ва паромлар қатнови тўхтатилди, маҳаллий аэропортлар ёпилди.
Изоҳ (0)