“Daryo” muxbirlari O‘zbekistonda xizmat ko‘rsatgan artist Mashrab Kimsanov xonadonida bo‘lib, uning turmush o‘rtog‘i, aktrisa Adolat Kimsanova bilan suhbatda bo‘ldi. Aktrisa turmush o‘rtog‘i rejissorligida suratga olingan “Tog‘lik kuyov” filmi nega telekanallarda namoyish etilmayotganiga izoh berdi.
— “Tog‘lik kuyov” filmini suratga olish ishlari boshlanganida men Melis Abzalov bilan “Chimildiq”ni tasvirga olish ishlari bilan band edim. Ammo turmush o‘rtog‘imni ilk rejissorlik ishida qo‘llab-quvvatlash uchun assistent bo‘lib ham ishlaganman.
“Tog‘lik kuyov” filmini suratga olish ishlari juda qiziq kechgan. Aktyorlarning gap-so‘zidan tortib, qo‘shiqlarigacha xalq og‘ziga tushdi. Hatto to‘ylarda kelin-kuyov ustidan gul sochish ham ana shu filmdan keyin an’anaga aylandi. Mashrab aka tog‘dagi syomkada: “Shahardan gul olib kelishmabdi, qizning qo‘liga gul berish kerak edi”, deb asabiylashib turganida yo‘lakda atirgullar qiyg‘och ochilganini ko‘rdim. “Hech bo‘lmasa shu atirgullarni olib, sochsak qanday bo‘larkan?”, deganman. Mashrab aka “Xo‘p, hech bo‘lmasa shunday qilinglar”, degan. Qarangki, vaziyatdan chiqish uchun qilgan ishimiz keyinchalik modaga aylandi. Hozir kelin-kuyovlarning ustidan ana shunday atirgul yaproqlarini sochishyapti.
“Tog‘lik kuyov” filmi sevib tomosha qilingani uchun avvallari har bayram kunlari namoyish etilardi. Ammo televideniyening xodimlari juda yomon ish qilishdi. Qahramon adashib suv o‘rniga aroq ichgan sahnalarini ko‘rsatmaslik uchun uning bir nechta kadrlarini kesib tashlashibdi. Vaholanki, bu sahnalar sujetga uzviy bog‘liq. Ularni olib tashlasa, kadrlar bir-biriga bog‘lanmaydi. Chunki bosh qahramonning fe’l-atvori ana shunday voqeliklarga qurilgan. Mashrab aka bir marta kinodagi sahnalar kesib tashlanganini ko‘rib, rosa yig‘lagan edi. Shuning uchunmi bilmadim, film 3-4 yildan buyon namoyish etilmayapti. Menimcha, rasvo qilib tashlashgani uchun ham namoyish etishmayapti. Qaniydi, o‘sha sahnalarni tiklab, yana namoyish etishsa bo‘ladi. Bu gaplarim bilan ko‘p joylarda savodsiz, noprofessional insonlar ishlayotgani haqida gapirmoqchiman. Ularning qo‘lidan birov yaratgan filmni kesib tashlash, ulash yoki umuman efirdan olib tashlash keladi. Xuddi bu do‘ppini olib kel desa, kallasini ham qo‘shib keladiganlarga o‘xshaydi, — deydi aktrisa Adolat Kimsanova.
Mavzuga doir:
- “Men o‘lsam hech kim kelmasa ham kerak” — aktrisa Adolat Kimsanova 50 yil ishlab mukofot ololmagani, teatrdan ishdan ketib kotiba bo‘lishga majbur bo‘lgani va ustidan kulgan unvonli aktrisalar haqida (video)
- “To‘rtinchi insultdan keyin to‘shakka mixlanib qoldi”. Taniqli aktyor va rejissor Mashrab Kimsanovning og‘ir xastalikka chalingani ma’lum qilindi (video)
Izoh (0)