“Daryo” muxbirlari O‘zbekistonda xizmat ko‘rsatgan artist Mashrab Kimsanov xonadonida bo‘lib, uning turmush o‘rtog‘i, aktrisa Adolat Kimsanova bilan suhbatda bo‘ldi. U hayotidagi qiyin vaziyatlar va aktrisalikdan ketib, kotiba bo‘lishga majbur bo‘lgani haqida so‘zlab berdi.
— Hayot muammolari bilan ovora bo‘lib bir zumda 70 yoshni qarshilab qo‘yay debmiz. Ortimga qarasam, yaxshi kunlari ham bor. Ammo kasbim orqasidan quvonchli kunlarim u qadar ko‘p bo‘lmadi. Ilgari inson mehnat qilsa, hamma niyatiga yetadi, deb o‘ylardim. Ammo o‘zbekchilikda bir mehnatni qilganda keyin atrofdagilar maqtashini kutish va o‘shalarni ham bunga tayyorlash kerak ekan. Ko‘pchilik ijodkorlar shunday qilishiga guvoh bo‘ldim. Misol uchun, bir jurnalist bilan gaplashib, meni maqtashi uchun uni rozi qilishim kerak ekan.
Shu yili san’atga qadam qo‘yganimga 50 yil bo‘ladi. Shu kasbim ortidan o‘lib ko‘rmadim xolos. Ba’zan o‘zim haqida gapirishga ham xijolat bo‘laman. Chunki 50 yil ishlagan bo‘lsam ham hali birorta unvonim yo‘q. Turmush o‘rtog‘imning unvoni bor ekanki, so‘rab surishtirib keldingiz. Men o‘lsam hech kim kelmasa ham kerak. Aslida men o‘z vaqtida mehnat qilganman, ammo hammasi bir chekkada qolib ketdi.
Hozirgi aktyorlar ijodiy uchrashuvlarga ham pul evaziga borishyapti. Ammo men borgan paytlarda bir tiyin pul berishmas edi. 2018-yilga qadar ijodiy uchrashuvlarga bordim. Keyinchalik o‘zlari ham taklif etmay qo‘yishdi. “Kelsa dardini aytadi”, deb o‘ylashdi, shekilli. Dardimni-ku aytmayman, shunchaki men ham aktrisa ekanligimni unutishmasligini istayman.
Ilgari ijodiy uchrashuvlarga borganda, “O‘zbekistonda xizmat ko‘rsatgan artist” deb chaqirishsa “Meni unvonim yo‘q”, deb gaplarini to‘g‘irlab ketmoqchi bo‘lsam, “Davlat bermasa biz sizga unvon beramiz”, degan gaplarni eshitib, xursand bo‘lib ketardim. Yonimda o‘tirgan unvoni bor aktrisalar miyig‘ida kulib, qiliq qilib o‘tirgan kunlarni ham ko‘rdim.
Ammo ularning hech bir mendek mehnat qilmagan. Qaysidir yo‘l bilan 30 yoshga qadar unvonni olgan aktrisalarni ham bilaman. Ammo bu gapim bilan hamma shunday demoqchi emasman, haqiqiy mehnatlarining evaziga unvon oladigan ham ko‘p. Boshqa yurtlarda bormi-yo‘qmi bilmadim-u, ammo O‘zbekistonda inson o‘z-o‘zini reklama qilishi, maqtashi kerak ekan, — deydi aktrisa Adolat Kimsanova.
Suhbat davomida Adolat Kimsanova nega davlat teatridan ketgani va moddiy jihatdan qiynalgani haqida ham so‘zlab berdi.
— Yosh tomoshabinlar teatrida 18 yil ishlaganman. Kenja farzandimni dunyoga keltirib, onalik ta’tilida o‘tirganimda moddiy jihatdan juda qiynalganmiz. Chunki “Sayuz” parchalanib, “Kinoaktyorlar studiyasi”da aktyorlar shtati bekor qilinganida keyin Mashrab aka butunlay ishsiz qolib ketgandi.
Majburlikdan bir yarim yashar bolamni olib, teatrga bordim. O‘sha paytda Olimjon Salimov rejissor bo‘lib ishga kelgan ekan. “Yosh bolangiz bor ekan, siz teatrga ish berolmaysiz, boring 3 yoshga to‘lganida kelasiz” , dedi. Nima deyishimni bilmay “Yo‘l kira qilib ketishga ham pulim yo‘q edi, ariza yozib qo‘yaqolay”, desam gapimni tasdiqladi. Balki to‘g‘ridir, ammo ishda insoniylikni ham unutmaslik kerak.
O‘sha inson turmush o‘rtog‘im ishsiz qolgach, uchta bola bilan qiynalib qolganimizni yaxshi bilardi. Xullas, mana shunday keyin 18 yil ishlagan davlat teatridan ketishga majbur bo‘ldim.
Nima qilishimni bilmay tekstil kombinatiga ishga bordim. Ammo kombinatning ishchi avtobusi uyimiz tomonga bormas ekan. Kombinatdagilar “Qanday yaxshi aktrisasiz, essiz ishsiz qoldingizmi?”, deb rosa kuyinishgan edi.
“Endi nima qilaman”, deb hayolga berilib avtobusda qaytayotganimda “Kinotexnikum” degan yozuvni ko‘rib, diplomimga ham kino so‘zi yozilgan-ku, deb bekatda tushib qoldim. Texnikum direktoriga ming rahmat, vaziyatimni tushunib, kotiba vazifasiga ishga oldi. Tushlik vaqti hamma ovqatlanishga shoshsa, men uyimga qarab yugurardim. Chunki uni emizib kelmasam injiqlanishni boshlardi.
Mashrab aka esa ikkita katta bolamizga qo‘shib, chaqalog‘imizga ham qarab o‘tirardi. Ammo bunda turmush o‘rtog‘imni ayblamayman. Chunki u paytda kinoaktyorga qiyin edi. Eng alam qilgani biz ana shunday qiyin kunlarni boshimizdan kechirganmiz. O‘shanda ham san’atdan ketganimiz yo‘q. Mashrab Kimsanov “Otamdan qolgan dalalar” kabi filmda qanday ajoyib rollarni ijro etgan. Shuhrat Abbosov, Melis Abzalov kabi taniqli rejissorlar bilan ishlagan aktyor. Ammo bu gaplar hozirgilarga umuman qiziq emas, — deydi aktrisa Adolat Kimsanova.
Izoh (0)