«Дарё» мухбирлари Ўзбекистонда хизмат кўрсатган артист Машраб Кимсанов хонадонида бўлиб, унинг турмуш ўртоғи, актриса Адолат Кимсанова билан суҳбатда бўлди. Актриса турмуш ўртоғи режиссёрлигида суратга олинган «Тоғлик куёв» фильми нега телеканалларда намойиш этилмаётганига изоҳ берди.
— «Тоғлик куёв» фильмини суратга олиш ишлари бошланганида мен Мелис Абзалов билан «Чимилдиқ»ни тасвирга олиш ишлари билан банд эдим. Аммо турмуш ўртоғимни илк режиссёрлик ишида қўллаб-қувватлаш учун ассистент бўлиб ҳам ишлаганман.
«Тоғлик куёв» фильмини суратга олиш ишлари жуда қизиқ кечган. Актёрларнинг гап-сўзидан тортиб, қўшиқларигача халқ оғзига тушди. Ҳатто тўйларда келин-куёв устидан гул сочиш ҳам ана шу фильмдан кейин анъанага айланди. Машраб ака тоғдаги съёмкада: «Шаҳардан гул олиб келишмабди, қизнинг қўлига гул бериш керак эди», деб асабийлашиб турганида йўлакда атиргуллар қийғоч очилганини кўрдим. «Ҳеч бўлмаса шу атиргулларни олиб, сочсак қандай бўларкан?», деганман. Машраб ака «Хўп, ҳеч бўлмаса шундай қилинглар», деган. Қарангки, вазиятдан чиқиш учун қилган ишимиз кейинчалик модага айланди. Ҳозир келин-куёвларнинг устидан ана шундай атиргул япроқларини сочишяпти.
«Тоғлик куёв» фильми севиб томоша қилингани учун авваллари ҳар байрам кунлари намойиш этиларди. Аммо телевидениенинг ходимлари жуда ёмон иш қилишди. Қаҳрамон адашиб сув ўрнига ароқ ичган саҳналарини кўрсатмаслик учун унинг бир нечта кадрларини кесиб ташлашибди. Ваҳоланки, бу саҳналар сюжетга узвий боғлиқ. Уларни олиб ташласа, кадрлар бир-бирига боғланмайди. Чунки бош қаҳрамоннинг феъл-атвори ана шундай воқеликларга қурилган. Машраб ака бир марта кинодаги саҳналар кесиб ташланганини кўриб, роса йиғлаган эди. Шунинг учунми билмадим, фильм 3-4 йилдан буён намойиш этилмаяпти. Менимча, расво қилиб ташлашгани учун ҳам намойиш этишмаяпти. Қанийди, ўша саҳналарни тиклаб, яна намойиш этишса бўлади. Бу гапларим билан кўп жойларда саводсиз, нопрофессионал инсонлар ишлаётгани ҳақида гапирмоқчиман. Уларнинг қўлидан биров яратган фильмни кесиб ташлаш, улаш ёки умуман эфирдан олиб ташлаш келади. Худди бу дўппини олиб кел деса, калласини ҳам қўшиб келадиганларга ўхшайди, — дейди актриса Адолат Кимсанова.
Мавзуга доир:
- «Мен ўлсам ҳеч ким келмаса ҳам керак» — актриса Адолат Кимсанова 50 йил ишлаб мукофот ололмагани, театрдан ишдан кетиб котиба бўлишга мажбур бўлгани ва устидан кулган унвонли актрисалар ҳақида (видео)
- «Тўртинчи инсультдан кейин тўшакка михланиб қолди». Таниқли актёр ва режиссёр Машраб Кимсановнинг оғир хасталикка чалингани маълум қилинди (видео)
Изоҳ (0)